🛑आजगाव येथील युवकाचा तुळस येथे मृतदेह सापडला.

✒️लोकसंवाद /- वेंगुर्ला.

आजगाव-शेटकरवाडी येथील मनीष गुंडू आजगावकर (वय ३२) या युवकाचा मृतदेह रविवारी सायंकाळी वेंगुर्ले तालुक्यातील तुळस येथील एका विहिरीत आढळून आला. या दुर्दैवी घटनेची नोंद वेंगुर्ले पोलीस ठाण्यात आकस्मिक मृत्यू म्हणून करण्यात आली आहे.मनीष आजगावकर हा घरातून बेपत्ता झाला होता आणि त्याचे नातेवाईक त्याचा शोध घेत होते. रविवारी सकाळी तो सावंतवाडी येथे असल्याची माहिती मिळाल्यानंतर नातेवाईकांनी त्याला तिथे गाठले. मात्र, मनीष आजगाव येथे स्वतःच्या घरी जाण्यास तयार नव्हता, त्यामुळे नातेवाईकांनी त्याला तुळस येथील त्याच्या मामाच्या घरी आणले. सायंकाळच्या सुमारास मामाच्या घराशेजारी असलेल्या विहिरीत तो मृतावस्थेत आढळून आला. मानसिक संतुलन बिघडल्यामुळे तोल जाऊन तो विहिरीत पडला असावा, असा प्राथमिक अंदाज वर्तवण्यात येत आहे.घटनेची माहिती मिळताच वेंगुर्ले पोलीस ठाण्याचे पीएसआय कांबळे, पोलीस हवालदार योगेश सराफदार आणि पोलीस कॉन्स्टेबल कलगोंडा यांनी तत्काळ घटनास्थळी धाव घेऊन पंचनामा केला. वेंगुर्ले पोलीस निरीक्षक निसर्ग ओतारी यांच्या मार्गदर्शनाखाली पोलीस हवालदार योगेश सराफदार या प्रकरणाचा पुढील तपास करत आहेत. मयत मनीष याच्या पश्चात आई, वडील आणि मामा असा परिवार आहे.