🛑श्री पुष्पसेन सावंत कॉलेज ऑफ फार्मसी येथे गुरुपौर्णिमा व आरोग्य सर्वेक्षण अभियानांतर्गत आरोग्य जनजागृती कार्यक्रम संपन्न.

✒️लोकसंवाद /- कुडाळ.

श्री. पुष्पसेन सावंत कॉलेज ऑफ फार्मसी, वाडी हुमरमळा येथे गुरुपौर्णिमेचे औचित्य साधून तसेच माजी उपमुख्यमंत्री कै.अजित पवार यांच्या स्मृतिप्रीत्यर्थ विशेष आरोग्य शिबिर व आरोग्य सर्वेक्षण अभियाना अंतर्गत जनजागृती कार्यक्रमाचे आयोजन करण्यात आले.

शासकीय वैद्यकीय महाविद्यालय व रुग्णालय, सिंधुदुर्गचे अधिष्ठाता (Dean) डॉ. अनंत दवंगे हे ह्या या कार्यक्रमाचे अध्यक्ष होते. इंद्रायणी शिक्षण प्रसारक मंडळाचे अध्यक्ष मा. भूपतसेन सावंत, कॅम्पस डायरेक्टर सौ. ऋतुजा परब तसेच महाविद्यालयाचे प्राचार्य डॉ. युवराज पांढरे आदी मान्यवरांची उपस्थिती व्यासपीठावर होती. कार्यक्रमाची सुरुवात मान्यवरांच्या हस्ते देवी सरस्वतीच्या प्रतिमेला पुष्पहार घालून व दिपप्रज्वलनाने झाली.

आपल्या अध्यक्षीय भाषणात डॉ.दवंगे यांनी विशेष आरोग्य शिबीर व विशेष आरोग्य सर्वेक्षण अभियान यांचे महत्त्व अधोरेखित करत सर्वांना या अभियानात सहभागी होऊन आरोग्य तपासणीचा लाभ घेण्याचे आवाहन केले.

यावेळी उपस्थित तज्ज्ञ डॉक्टरांनी स्थूलता , हर्निया , व्हेरिकोज वेन्स , मुख कर्करोग , थॅलेसेमिया, टाईप-१ डायबेटीस , पॅलिएटिव्ह केअर , मानव दूध बँक , कृत्रिम अवयव व पुनर्वसन , हृदयविकार तसेच असंसर्गजन्य आजारांवर सविस्तर मार्गदर्शन केले. त्यांनी या आजारांची लक्षणे, कारणे, प्रतिबंधात्मक उपाययोजना, वेळेवर निदान, उपलब्ध उपचारपद्धती तसेच निरोगी जीवनशैलीचे महत्त्व विद्यार्थ्यांना व उपस्थितांना समजावून सांगितले.

यावेळी मान्यवरांनी गुरुपौर्णिमेचे महत्त्व अधोरेखित करत गुरुजनांप्रती कृतज्ञता व्यक्त केली. विद्यार्थ्यांनीही या जनजागृती कार्यक्रमात उत्स्फूर्त सहभाग घेत आरोग्यविषयक माहिती आत्मसात केली. कार्यक्रमामुळे विद्यार्थ्यांमध्ये तसेच उपस्थितांमध्ये विविध आजारांविषयी जागरूकता निर्माण होण्यास मोलाची मदत झाली.

कार्यक्रमाचे सुत्रसंचालन सहाय्यक प्राध्यापक महादेव परब यांनी केले.कार्यक्रमास पुष्पसेन ज्ञानपीठातील सर्व प्राचार्य,प्राध्यापक, शिक्षकेतर कर्मचारी व विद्यार्थी मोठ्या संख्येने उपस्थित होते.