🛑कुडाळ येथील बेकायदेशीर हत्यार कारखान्याप्रकरणी आरोपीला 50 हजाराच्या अटी-शर्तींवर जामीन मंजूर.

✒️लोकसंवाद /- कुडाळ.

कुडाळ जवळील निरूखे सुतारवाडी येथे विनापरवाना बंदुका तयार करणे व दुरुस्ती करण्याच्या बेकायदेशीर कारखान्याप्रकरणी अटक करण्यात आलेला आरोपी क्र. ५ सिद्धेश चंद्रकांत मराठे (वय २९, रा. कडावल गडकरवाडी, ता. कुडाळ) याची मे. न्यायालयाने ५० हजार रुपयांच्या योग्य त्या अटी-शर्तींवर जामिनावर मुक्तता केली आहे. आरोपीच्या वतीने ॲड. विनय मांडकुलकर यांनी कोर्टात मांडलेला कायदेशीर युक्तिवाद ग्राह्य धरून हा जामीन मंजूर करण्यात आला. या कामात त्यांना ॲड. विवेक मांडकुलकर, ॲड. प्रणाली मोरे, ॲड. वृषांग जाधव, व ॲड. सुयश गवंडे यांनी संरक्षण वकील म्हणून सहकार्य केले.
या प्रकरणी कुडाळ पोलीस ठाण्यात गुन्हा रजि. नं. १४९/२०२६ अन्वये शस्त्र अधिनियम (आर्म्स ऍक्ट) कलम ३, ५, ७, २५(१)(a), २५(१A), २५(१AA), २५(१B) प्रमाणे गुन्हा दाखल करण्यात आला होता. स्थानिक गुन्हे अन्वेषण विभाग, सिंधुदुर्गचे विल्सन झुरो डिसोजा यांनी याप्रकरणी फिर्याद दिली होती.

गुन्ह्याची हकीगत: दिनांक २७.०४.२०२६ रोजी रात्री २३.०५ वाजण्याच्या सुमारास मौजे निरूखे सुतारवाडी, ता. कुडाळ येथील एका शेडवर पोलिसांनी छापा टाकला होता. या कारवाईत विनापरवाना बंदुका, बंदुकांचे सुटे भाग, तसेच बंदुका तयार करण्यासाठी व दुरुस्तीसाठी लागणारे मशीन व साहित्य असा मोठा मुद्देमाल जप्त करण्यात आला होता. आरोपी क्र. ५ सिद्धेश चंद्रकांत मराठे याच्याकडे तपास केला असता, त्याच्याकडे गनपावडर, छरे व २ बेकायदेशीर अग्निशस्त्रे मिळून आली होती. या गुन्ह्याप्रकरणी पोलिसांनी त्याला २८.०४.२०२६ रोजी अटक करून न्यायालयात हजर केले होते.
सदर प्रकरणाची गांभीर्य लक्षात घेता, आरोपीच्या वतीने न्यायालयात जामीन अर्ज दाखल करण्यात आला होता. दिनांक २५/०५/२०२६ रोजी झालेल्या सुनावणी दरम्यान आरोपीचे मुख्य वकील ॲड. विनय विवेक मांडकुलकर यांनी न्यायालयात युक्तिवाद करताना कायदेशीर बाजू आणि तांत्रिक मुद्दे अत्यंत प्रभावीपणे मांडले. हा युक्तिवाद मे. न्यायालयाने ग्राह्य मानून आरोपी सिद्धेश चंद्रकांत मराठे याला ५०,००० (पन्नास हजार) रुपयांच्या जामिनावर व योग्य त्या अटी-शर्तींवर मुक्त करण्याचे आदेश दिले.
या खटल्यात आरोपी सिद्धेश मराठे याच्या वतीने ॲड. विनय मांडकुलकर, ॲड. विवेक मांडकुलकर, ॲड. प्रणाली मोरे, ॲड. वृषांग जाधव व ॲड. सुयश गवंडे या वकील पथकाने काम पाहिले.