🛑पहिल्याच पावसाने महावितरणच्या मान्सूनपूर्व तयारीचा फज्जा!

✒️लोकसंवाद /-कणकवली.

तालुक्यात शनिवारी सायंकाळी अवघा दीड तास मुसळधार पाऊस झाला, मात्र या पावसानेच महावितरण विभागाच्या मान्सूनपूर्व तयारीचा अक्षरशः पंचनामा केल्याची भावना नागरिकांमधून व्यक्त होत आहे. पावसासह वादळी वाऱ्यामुळे कणकवली तालुक्यातील अनेक गावांचा वीजपुरवठा खंडित झाला आणि नागरिकांना अंधाराचा सामना करावा लागला.

दरवर्षी मान्सूनपूर्व काळात वीजवाहिन्यांवरील झाडांच्या फांद्या छाटणे, जीर्ण व तुटण्याच्या अवस्थेतील तारा बदलणे, विद्युत यंत्रणांची तपासणी करणे अशी विविध कामे केली जात असल्याचा दावा महावितरणकडून केला जातो. मात्र पहिल्याच पावसात अनेक ठिकाणी वीजपुरवठा खंडित झाल्याने या कामांवरच प्रश्नचिन्ह उपस्थित झाले आहे.

नागरिकांच्या मते, अनेक भागांत धोकादायक अवस्थेतील वीजवाहिन्या अद्याप बदलण्यात आलेल्या नाहीत. तसेच लाईनवर आलेली झाडे आणि फांद्यांची छाटणीही पुरेशी करण्यात आलेली नाही. परिणामी पाऊस आणि वाऱ्यामुळे वीजपुरवठा खंडित होण्याच्या घटना घडल्या.

विशेष म्हणजे गेल्या महिनाभरात देखभाल आणि दुरुस्तीच्या कामांसाठी अनेक वेळा नियोजित वीजबंदी करण्यात आली होती. मात्र त्यानंतरही पहिल्याच पावसात मोठ्या प्रमाणात वीजपुरवठा खंडित झाल्याने नागरिकांमध्ये तीव्र नाराजी व्यक्त होत आहे. “महिन्यात चार वेळा लाईट बंद ठेवून नेमकी कोणती कामे करण्यात आली? नागरिकांनी वारंवार अंधारात किती काळ राहायचे?” असा सवाल संतप्त नागरिकांनी उपस्थित केला आहे.

नागरिकांनी आणखी एक मुद्दा मांडला आहे. वीजबिल वेळेत न भरल्यास महावितरणकडून तत्काळ कारवाई करून वीजजोडणी खंडित केली जाते. मात्र सेवा देण्याच्या बाबतीत अपेक्षित कार्यक्षमता दिसून येत नसल्याची टीका नागरिकांकडून होत आहे. त्यामुळे ग्राहकांनी महावितरणला सहकार्य करावे, तर महावितरणनेही दर्जेदार आणि अखंडित सेवा देण्याची जबाबदारी पार पाडावी, अशी मागणी होत आहे.

दरम्यान, या प्रकारामुळे जिल्ह्यातील जबाबदार लोकप्रतिनिधींनी महावितरणच्या मान्सूनपूर्व कामांचा प्रत्यक्ष आढावा घेण्याची गरज व्यक्त केली जात आहे. पावसाळ्याची नुकतीच सुरुवात झाली असताना ही परिस्थिती असेल तर पुढील काळात काय होणार, अशी चिंता नागरिकांमधून व्यक्त होत आहे. त्यामुळे महावितरण विभागाच्या कामकाजाची चौकशी करून आवश्यक सुधारणा करण्याची मागणी आता जोर धरू लागली आहे.