🛑आमदार निलेश राणे यांची कार्यतत्परता ; पावशी महामार्गावर अखेर दुभाजक बसले..

✒️लोकसंवाद /- समिल जळवी,कुडाळ.

मुंबई-गोवा महामार्गावरील पावशी येथील सर्विस रोडला दुभाजक नसल्याने निर्माण झालेल्या अपघाताच्या धोक्याची दखल घेत, आमदार निलेश राणे यांनी प्रशासनाला दिलेले आदेश अखेर अमलात आले आहेत. महामार्ग ठेकेदार आणि संबंधित प्रशासनाने या ठिकाणी तात्काळ दुभाजक बसवल्याने पावशीवासीयांना मोठा दिलासा मिळाला असून, जनतेतून आमदारांच्या कार्यतत्परतेबद्दल आभार व्यक्त होत आहेत.
नुकतीच कुडाळ येथे तालुका प्रशासनाची आमदार निलेश राणे यांच्या नेतृत्वाखाली आमसभा पार पडली होती. या आमसभेत पावशी येथील स्थानिक रहिवाशांनी महामार्गाच्या सर्विस रोडच्या कामातील त्रुटींकडे लक्ष वेधले होते. सर्विस रोडला दुभाजक नसल्याने वाहनांच्या येण्या-जाण्यामुळे अपघातांची दाट शक्यता होती. हा प्रश्न अत्यंत गंभीर असल्याचे ग्रामस्थांनी आमसभेत मांडले.
जनतेची कैफियत ऐकून घेतल्यानंतर आमदार निलेश राणे यांनी या प्रश्नाची गंभीर दखल घेतली. त्यांनी आमसभेतच संबंधित महामार्ग प्रशासन आणि ठेकेदाराला धारेवर धरत, “जनतेचा जीव धोक्यात घालू नका,” अशा शब्दांत सुनावले. तसेच, कोणत्याही विलंबाशिवाय त्या ठिकाणी तात्काळ दुभाजक बसवण्याचे स्पष्ट आदेश दिले होते.

आमदारांच्या आदेशानंतर महामार्ग प्रशासन आणि संबंधित ठेकेदाराने हालचाली करत पावशी येथील संबंधित ठिकाणी दुभाजक बसवण्याचे काम पूर्ण केले आहे. यामुळे या भागातील वाहतूक आता अधिक शिस्तबद्ध आणि सुरक्षित झाली आहे.

केवळ आश्वासन न देता प्रत्यक्ष कृतीतून प्रश्न मार्गी लावल्याने पावशी परिसरातील नागरिकांनी समाधान व्यक्त केले आहे. लोकप्रतिनिधी असावा तर असा, अशा शब्दांत ग्रामस्थांनी आमदार निलेश राणे यांचे आभार मानले आहेत. यामुळे महामार्गावरील अपघातांचे सत्र रोखण्यास मोठी मदत होणार आहे.