🛑सावंतवाडीत लॉजमध्ये मुंबईतील एका ईसमाचा सापडला मृतदेह.

✒️लोकसंवाद /- सावंतवाडी.

सावंतवाडी शहरातील साईकृपा लॉजिंगमध्ये वास्तव्यास असलेले नवी मुंबई-कोपर खैरणे येथील पर्यटक नोवेल अल्बर्ट डिसोजा (वय ७०) यांचा हृदयविकाराच्या झटक्याने मृत्यू झाला. ही घटना १९ एप्रिल रोजी सायंकाळी ६ वाजण्याच्या सुमारास उघडकीस आली.

मिळालेल्या माहितीनुसार, डिसोजा हे गेल्या चार दिवसांपासून या लॉजिंगमध्ये राहत होते. रविवारी संध्याकाळी सर्विसबॉय खोलीच्या सफाईसाठी गेला असता, डिसोजा यांच्या शरीराची कोणतीही हालचाल दिसून आली नाही. त्यानंतर तातडीने १०८ रुग्णवाहिका बोलावून त्यांना उपजिल्हा रुग्णालयात नेण्यात आले, मात्र डॉक्टरांनी त्यांना मृत घोषित केले.

शवविच्छेदनानंतर त्यांचा मृत्यू हृदयविकाराच्या झटक्याने झाल्याचे स्पष्ट झाले आहे. याप्रकरणी सावंतवाडी पोलीस ठाण्यात आकस्मिक मृत्यूची नोंद करण्यात आली असून, हवालदार सुरेश पाटील अधिक तपास करत आहेत.