🛑घर घर संविधान’ उपक्रमांतर्गत कुडाळमध्ये उद्देशिकेचे वाटप..

✒️लोकसंवाद /- समिल जळवी,कुडाळ.

‘घर घर संविधान’ या उपक्रमाच्या अनुषंगाने डॉ. बाबासाहेब आंबेडकर यांच्या जयंतीनिमित्त कुडाळ नगरपंचायतीतर्फे भारतीय संविधानाची उद्देशिका नागरिकांना वाटप करण्यात आले. या उपक्रमांतर्गत एकूण ३,००० उद्देशिका फ्रेमचे वाटप करण्यात येणार आहे.

या उपक्रमाचा मुख्य उद्देश संविधानातील मूलभूत तत्त्वे प्रत्येक घरापर्यंत पोहोचवणे आणि नागरिकांमध्ये संविधानाबाबत जागरूकता निर्माण करणे हा आहे. या वेळी नागरिकांनी मोठ्या उत्साहात सहभाग नोंदवत उद्देशिकेच्या प्रती स्वीकारल्या.

कार्यक्रमादरम्यान कुडाळ नगरपंचायतीचे नगराध्यक्षा श्रीमती प्राजक्ता अशोक बांदेकर- शिरवलकर यांनी संविधानाचे महत्त्व अधोरेखित करत समानता, स्वातंत्र्य, बंधुता आणि न्याय या मूल्यांचे पालन करण्याचे आवाहन केले. ‘घर घर संविधान’ या मोहिमेमुळे नागरिकांमध्ये संविधानाबद्दल अधिक जाणिवा निर्माण होत असल्याचे मत यावेळी व्यक्त करण्यात आले.

या कार्यक्रमानिमित्त नगरसेवक विलास कुडाळकर, नयना मांजरेकर, चांदणी कांबळी, अभिषेक गावडे, रामचंद्र परब, राजीव कुडाळकर, ज्योती जळवी, गणेश भोगटे, नगरपंचायतीचे अधिकारी, कर्मचारी तसेच स्थानिक नागरिक मोठ्या संख्येने उपस्थित होते.