🛑सार्वजनिक संपत्ती नुकसानप्रकरणी सातजणांची निर्दोष मुक्तता..

✒️लोकसंवाद /- वेंगुर्ला.

महाराष्ट्र जीवन प्राधिकरणाचे सावंतवाडी उपविभागाचे डेप्युटी इंजिनियर हेमंत दामोदरे यांनी दिलेल्या तक्रारीनुसार, गणेश रघुनाथ रेगे (मयत) यांच्यासह आठजणांवर वेंगुर्ले पोलिसांनी सार्वजनिक संपत्तीची नुकसान प्रतिबंध अधिनियम १९८४ चे कलम ३ (२) (क) व ७ प्रमाणे वेंगुर्ले न्यायालयात गुन्हा दाखल केला होता.गुन्ह्यातून सर्व आरोपींची दिवाणी न्यायाधीश वेंगुर्ले यांनी निर्दोष मुक्तता केली.संशयितांतर्फे अॅड. अजित भणगे, अॅड. मिहीर भणगे, अॅड. सुनील मालवणकर, अॅड. स्वप्ना सामंत यांनी काम पाहिले.

महाराष्ट्र जीवन प्राधिकरण, उपविभाग सावंतवाडी येथे डेप्युटी इंजिनियर म्हणून हेमंत विष्णू दामोदरे हे कार्यरत होते. त्यांच्या अखत्यारित असलेले वेंगुर्लेतील आरवली येथे पे अॅण्ड युज टॉयलेट या तत्वावर शौचालय बांधकामास सिंधुदुर्ग जिल्हाधिकारी यांनी सन २००४ मध्ये रक्कम रू. ७,१२,६५० किमतीची प्रशासकिय मान्यता दिलेली होती. ते बांधकाम पूर्ण झाल्यानंतर ते आरवली ग्रामपंचायतीच्या ताब्यात देखभाल व दुरूस्तीसाठी द्यावयाचे होते. मात्र, सदरील बांधकामाचा ताबा आरवली ग्रामपंचायतीने घेतला. नाही.१० जुलै २०१४ रोजी पोलीस पाटील मधुसुदन गजानन सुतार-मेस्त्री यांनी पत्राने महाराष्ट्र जीवन प्राधिकरणास कळविले की, सदरचे बांधकाम काही समाजकंटकांनी फोडले आहे. याबाबत महाराष्ट्र जीवन प्राधिकरणाचे अधिकारी श्री. दामोदरे यांनी अज्ञात इसमाविरूद्ध पोलिसांत फिर्याद दाखल केली होती. त्यानुसार पोलिसांनी तपासात गणेश रेगे, बाबुराव आरोलकर, बाळकृष्ण येसजी, यशवंत कांबळी, सुभाष कांबळी, विजय मेस्त्री, सुभाष पेडणेकर, अनंत कुडव यांनी गणेश रेगे यांच्या सांगण्यावरून बांधकामाचा भाग तोडून टाकला, असे मधुसुदन सुतार-मेस्त्री, जयवंत राय, सावळाराम टांककर आदींच्या जबाबावरून आढळले होते. पुराव्याअभावी न्यायाधीश एस. जी. चिवटे यांनी संशयितांची निर्दोष मुक्तता केली.