🛑कुडाळ पोलिसांनी गांजा विक्रीसाठी आलेल्या एका तरुणाला रंगेहात केली अटक.;गुप्त माहितीवरून सापळा रचून आरोपी ताब्यात.

✒️लोकसंवाद /- कुडाळ.

सिंधुदुर्ग जिल्ह्यात अंमली पदार्थांविरोधात सुरू असलेल्या कठोर मोहिमेला मोठे यश मिळाले असून कुडाळ पोलिसांनी गांजा विक्रीसाठी आलेल्या एका तरुणाला रंगेहात अटक केली आहे. या कारवाईमुळे परिसरात खळबळ उडाली आहे.

कुडाळ एमआयडीसी परिसरातील वरची कुंभारवाडी येथील जुन्या पाण्याच्या टाकीजवळ गांजा विक्री होणार असल्याची गुप्त माहिती पोलिसांना मिळाली होती. या माहितीच्या आधारे पोलीस निरीक्षक राजेंद्र मगदूम यांच्या नेतृत्वाखाली तातडीने सापळा रचण्यात आला. संशयित इसम घटनास्थळी येताच पोलिसांनी त्याला ताब्यात घेतले.

अटक करण्यात आलेल्या आरोपीचे नाव शुभम संदीप परब (वय २३, रा. कुडाळेश्वरवाडी) असे असून त्याच्याकडून ५३६ ग्रॅम गांजा जप्त करण्यात आला. या गांजाची अंदाजे किंमत २६,८०० रुपये आहे.याशिवाय पोलिसांनी आरोपीकडून रोख रक्कम ३,८७० रुपये, डिजिटल वजन काटा,गांजा पॅकिंगसाठी वापरण्यात येणाऱ्या प्लास्टिक पिशव्या तसेच आधारकार्ड व मतदान ओळखपत्र असा एकूण ३८,२७० रुपयांचा मुद्देमाल जप्त केला आहे.

ही कारवाई पोलीस अधीक्षक मोहन दहिकर, अपर पोलीस अधीक्षक नयोमी साटम आणि उपविभागीय पोलीस अधिकारी विनोद कांबळे यांच्या मार्गदर्शनाखाली करण्यात आली. या पथकात उपनिरीक्षक सचिन अवताडे व इतर कर्मचाऱ्यांचा समावेश होता.

दरम्यान, “अंमली पदार्थांचे सेवन किंवा विक्री करणाऱ्यांविरोधात कठोर कारवाई करण्यात येईल. नागरिकांनी अशा प्रकारची माहिती पोलिसांना द्यावी; माहिती देणाऱ्याचे नाव गोपनीय ठेवले जाईल,” असे आवाहन पोलीस निरीक्षक राजेंद्र मगदूम यांनी केले आहे.अटक आरोपीला गुरुवारी न्यायालयात हजर करण्यात येणार असल्याची माहिती पोलिसांकडून देण्यात आली आहे.