🛑पालकमंत्री नितेश राणेंच्या नेतृत्वाखाली भाजपाचा बिनविरोध धडाका.

◼️नांदगाव पं.स. व कोळपे जि.प.भाजपाकडे.

✍️लोकसंवाद/-नांदगाव, वैभववाडी.

जिल्हा परिषद व पंचायत समिती निवडणुकांच्या पार्श्वभूमीवर पालकमंत्री नितेश राणे यांच्या नेतृत्वाखाली भाजपाने बिनविरोध विजयांची मालिका सुरू ठेवत विरोधकांना जबरदस्त राजकीय धक्का दिला आहे. नांदगाव पंचायत समिती आणि कोळपे जिल्हा परिषद या दोन्ही महत्त्वाच्या मतदारसंघांत भाजपाचे उमेदवार बिनविरोध निवडून येणार असल्याचे निश्चित झाले आहे.
नांदगाव पंचायत समिती मतदारसंघात भाजपाच्या उमेदवार हर्षदा वाळके या बिनविरोध निवडून येणार आहेत. त्यांच्या विरोधातील ठाकरे शिवसेनेच्या धनश्री मेस्त्री तसेच अपक्ष उमेदवार प्राची निरज मोरये यांनी उमेदवारी अर्ज माघारी घेतल्याने भाजपाचा विजय निर्विवाद ठरला. निवडणूक प्रक्रियेच्या अखेरच्या दिवशी घडलेल्या या घडामोडींमुळे नांदगाव मतदारसंघ भाजपाच्या ताब्यात गेला आहे.
दरम्यान, कोळपे जिल्हा परिषद मतदारसंघातही भाजपाचा भगवा फडकला आहे. उबाठाचे उमेदवार जितेंद्र तळेकर यांनी ऐनवेळी रिंगणातून माघार घेतल्याने भाजपाचे अधिकृत उमेदवार प्रमोद रावराणे यांची बिनविरोध निवड निश्चित झाली आहे. याआधी उबाठाचे सुनील नारकर यांचा अर्ज छानणीत बाद झाला होता, तर भाजपाच्या डमी उमेदवारांनी अर्ज मागे घेतल्याने रावराणे एकमेव उमेदवार ठरले.
प्रमोद रावराणे यांच्या बिनविरोध निवडीनंतर वैभववाडीत भाजपात जल्लोष तर उबाठात सन्नाटा असे चित्र पाहायला मिळाले. कार्यकर्त्यांनी फटाके फोडून आनंद व्यक्त केला.
याआधी कोकिसरे पंचायत समितीत भाजपाच्या साधना नकाशे या बिनविरोध ठरल्या असून, आता नांदगाव व कोळपे येथील यशामुळे उबाठा सेनेला पाठोपाठ धक्के बसत आहेत, तर भाजपाचा विजयाचा वारू सुसाट सुटल्याचे स्पष्ट झाले आहे.
या सलग बिनविरोध विजयांमुळे सिंधुदुर्ग जिल्ह्यात भाजपाचे बळ अधिक मजबूत झाले असून, पालकमंत्री नितेश राणेंचा राजकीय दबदबा पुन्हा एकदा ठळकपणे अधोरेखित झाला आहे.