🛑देवगड येथे माहितीचा अधिकार कायदा 2005 बाबत मार्गदर्शन..

🖋️लोकसंवाद /- देवगड.

पंचायत समिती देवगड येथे अधिकारी व कर्मचारी यांच्यासाठी यशदा, पुणे यांचे माहिती अधिनियमाचे प्रशिक्षक डॉ. गणेश उर्फ भाई बांदकर यांनी माहितीचा अधिकार २००५ बाबत विस्तृत मार्गदर्शन केले. तसेच सर्वांच्या शकांचे निरसन केले. डाॅ.भाई बांदकर हे देवगडचे सुपुत्र असल्याकारणाने त्यांनी पंचायत समितीच्या प्रत्येक विभागातील माहिती अधिकाराअन्वये आतापर्यंत आलेल्या अर्जांचा आढावा घेतला, जास्त अर्ज कोणत्या कारणांसाठी येतात त्याची माहिती घेतली व देवगड प्रशासनात माहिती अधिकारातील उगाचच येणाऱ्या अर्जांची संख्या शुन्यापर्यंत कशी नेता येईल याबाबत काही टीप्सही दिल्या. जनमाहिती अधिकारी व प्रथम अपिलीय अधिकारी यांना विशेष मार्गदर्शन केले व पुढील काळात माहिती अधिकार अधिनियम प्रश्नाबाबत काही समस्या उद्भवल्यास ती निरसन करण्याच्या सहकार्याची ग्वाही डाॅ.भाई बांदकर यांनी दिली.

यावेळी पंचायत समिती देवगड सहाय्यक गटविकास अधिकारी दिगंबर खराडे, कक्ष अधिकारी संतोष बिर्जे, अधिक्षक मेधा राणे आदी मान्यवर तसेच पंचायत समिती देवगड अधिकारी व कर्मचारी उपस्थित होते .

या कार्यक्रमाच्या आयोजनात मोलाचे सहकार्य गटविकास अधिकारी श्री.चव्हाणसाहेब व कक्ष अधिकारी श्री.संतोष बिर्जे यांचे लाभले.या प्रशिक्षणामध्ये प्रस्तावना सहाय्यक गटविकास अधिकारी दिगंबर खराडे , सुत्रसंचलन कक्ष अधिकारी संतोष बिर्जे व आभार प्रकल्प अधिकारी बाबली होडावडेकर यांनी मानले. यावेळी यशदा पुणे यांची माहिती अधिकार अधिनियम 2005 विषयीची पुस्तिका प्रत्येक सहभागीस विनामुल्य देण्यात आली.