🛑तळेबाजार पोस्ट ऑफिसमधील चोरीप्रकरणी संशयित अटकेत.

🖋️लोकसंवाद /- देवगड.

तळेबाजार येथील पोस्ट ऑफिसमधील चोरीप्रकरणी गुरुदास अनंत मेस्त्री (३५, रा. खुडी) या संशयिताला पोलिसांनी ताब्यात घेतले. सीसीटीव्ही फुटेजच्या आधारे देवगड पोलीस व स्थानिक गुन्हा अन्वेषण विभागाने हा संयुक्त तपास केला. संशयितावर गुन्हा दाखल करून त्याला अटक करण्यात आली. न्यायालयाने संशयिताला दोन दिवसांची पोलीस कोठडी सुनावली आहे. पोलिसांनी दिलेल्या माहितीनुसार, तळेबाजार येथील पोस्ट ऑफिसचे मागील दार उघडून अज्ञात चोरट्याने आत प्रवेश करून कार्यालयीन कामकाजाचे दोन मोबाईल चोरून नेले होते. यात सॅमसंग व रियल मी कंपनीचा प्रत्येकी एक मोबाईल असा सुमारे सहा हजार रुपयांचा मुद्देमाल अज्ञाताने लंपास केला होता. ही घटना गुरुवारी सकाळी ८ वा. च्या सुमारास उघडकीस आली होती. या घटनेची फिर्याद पोस्ट ऑफिसचे प्रभारी डाक सहाय्यक आशिष संदिपान कुसभागे यांनी देवगड पोलीस ठाण्यात दिली होती. त्यानुसार अज्ञात चोरट्याविरुद्ध बीएनएस ३०५, ३२१ (३), ३२१ (४) नुसार गुन्हा दाखल करण्यात आला होता. दरम्यान, या घटनेचा देवगड पोलीस व स्थानिक गुन्हा अन्वेषण विभागाच्या पथकाने संयुक्त तपास केला. सीसीटीव्ही फुटेजच्या आधारे संशयित गुरुदास मेस्त्री याला ताब्यात घेऊन गुन्हा दाखल करण्यात आला व अटक करून न्यायालयासमोर हजर करण्यात आले. संशयितावर यापूर्वी दुचाकी चोरीच्या गुन्ह्यांची नोंद आहे. घटनेचा तपास पोलीस उपनिरीक्षक संतोष भालेराव करत आहेत.