🛑12 सप्टेंबरपर्यंत करुळ घाट वाहतुकीसाठी बंद.;जिल्हाधिकाऱ्यांचे आदेश.

🖋️लोकसंवाद /- वैभववाडी.

करुळ घाट परिसरात संभाव्य दरडी कोसळण्याचा धोका लक्षात घेऊन नागरिकांच्या सुरक्षिततेच्या दृष्टीने तरेळे–कोल्हापूर राष्ट्रीय महामार्गावरील वाहतूक १२ सप्टेंबर २०२५ पर्यंत बंद ठेवण्याचे आदेश अप्पर जिल्हाधिकारी मच्छिंद्र सुकटे यांनी दिले आहेत. या काळात वाहतूक भुईबावडा घाट (राज्यमार्ग १७१) आणि फोंडा घाट (राज्यमार्ग १७८) या मार्गांमार्फत वळवण्यात आली आहे.

गुरुवारी सकाळी आठच्या सुमारास करुळ घाटात मोठ्या प्रमाणात दरड कोसळल्याने महामार्गावरील वाहतूक ठप्प झाली. राष्ट्रीय महामार्ग प्राधिकरणाने युद्धपातळीवर दरड हटवण्याचे काम हाती घेतले असून, ते आज (शुक्रवार) दुपारपर्यंत पूर्ण होण्याची शक्यता आहे. मात्र घाटातील अनेक ठिकाणी खडकांना तडे गेले असल्याने पुन्हा दरडी कोसळण्याचा धोका कायम आहे. त्यामुळे खडकांचे सैलकरण करण्यासाठी तज्ञ अभियंत्यांची मदत घेतली जाणार आहे. हे काम पूर्ण होण्यासाठी साधारण आठ दिवस लागणार आहेत.

नागरिकांच्या सुरक्षिततेसह आपत्ती व्यवस्थापनाच्या दृष्टीने वाहतूक बंद करण्याचा निर्णय घेतला असून, पर्यायी मार्गांवर दिशादर्शक फलक आणि वाहतूक संकेतचिन्हे स्पष्ट भाषेत लावण्याच्या सूचना राष्ट्रीय महामार्ग प्राधिकरणाला देण्यात आल्या आहेत.