🛑पावसाळी बंदी उठल्यानंतरही मासेमारी थंड.

🖋️लोकसंवाद /- समिल जळवी,सिंधुदुर्ग.

पावसाळी मासेमारी बंदी संपल्यानंतर मच्छीमार नौकांच्या मासेमारीचे पहिले काही दिवस चांगले गेले. मात्र, त्यानंतर समुद्रातील वातावरण खवळलेले असल्याने अनेक नौका समुद्रात मासेमारीसाठी जावू शकलेल्या नाहीत. ज्या नौका समुद्रात मासेमारीसाठी गेल्या त्यांना पुरेशी मासळी न मिळाल्याने मासळीचे दर कडाडलेलेच होते. श्रावणातील उपवास संपल्यानंतरच्या रविवारी दर वधारलेले असल्याने मासळी मार्केटमध्ये शुकशुकाट होता.

समुद्रातील मासे खाणार्‍या केंड माशाव्यतिरिक्त इतर चविष्ठ मासळी फारच कमी प्रमाणात मिळाली. हा केंड मासा फिशमिल कंपन्यांना विकला जातो. लेप जातीचा मासा मात्र बर्‍यापैकी मिळत होता, असे मच्छीमारांनी सांगितले. खवय्यांना आवडणारी मासळी मिळालीच नसल्याने मार्केटमध्ये आलेल्या माशांचे दर चढे होते. यामध्ये पापलेटचा किलोचा दर 1 हजार रुपये इतका होता.लहान सुरमई 600 रुपये किलो दराने मिळत होत्या.बांगडा 130 ते 150 रुपये तर सौंदाळा आकारानुसार 300 ते 350 रुपये दराने विकला जात होता. लहान कोळंबीचा 1 किलोचा दर 250 रुपये तर मोठ्या कोळंबीचा दर 400 रुपये इतका होता. त्यामुळे खवय्यांची मासळी मार्केटमध्ये फारच कमी गर्दी होती.