🛑शिर्डी येथील सामुदायिक पारायण सोहळ्याचे जनक श्री शांताराम मिराणे यांचा विशेष सत्कार.

🖋️लोकसंवाद /- सिंधुदुर्ग.

श्री सदगुरू साईबाबा यांच्या अध्यात्मिक,दैवी चमत्कार, आणि सहवास तसेच जगभरातून सातत्याने भेट देणाऱ्या लाखो साईभक्त यामुळे लौकिकास आलेल्या शिर्डी आणि सिंधुदुर्ग (कुडाळ) यांचे आगळे वेगळे अध्यात्मिक नाते आहे.

एकोणीसशे अठरा साली साईबाबा यांचे महानिर्वाण झाल्यानंतर शिर्डी येथे समाधी मंदिर बांधण्यात आले आणि त्यानंतर देशातील पहिले साईमंदिर साईभक्त कै. दादा माडये यांनी कुडाळ कविलगाव येथे एकोणीसशे बावीस साली बांधले.
श्री साई संस्थान विश्वस्त व्यवस्थेची स्थापना झाल्यानंतर संस्थानचे पहिले अध्यक्ष हे आपल्या सिंधुदुर्ग जिल्ह्यातील पेडूर खरारेवाडी येथील कै. नागेश आत्माराम सावंत हे होते.
साईबाबांच्या अध्यात्मिक दैवी चमत्काराची जीवनगाथा “श्री साई चरित्र” या ग्रंथरुपात वेंगुर्ला दाभोली येथील साईभक्त कै. गोविंद रघुनाथ दाभोलकर यांनी लिहिली.

*श्रध्दा आणि सबुरी” हा मंत्र आचरणात आणणारे लाखो साईभक्त आज जगभरात आहेत.
श्री साई चरित्र ग्रंथात उल्लेख केलेले आणि साईबाबांची शिर्डी मध्ये सेवा केलेले काशीराम शिंपी यांच्या चौथ्या पिढीतील पणतू श्री शांताराम रंगनाथ मिराणे सर यांनीही हा वारसा जपत हीच परंपरा पुढे चालू ठेवली आहे आणि शिर्डी व सिंधुदूर्ग (कुडाळ) हे अध्यात्मिक नाते जोपासले आहे.१९९५ साली श्रावण शुद्ध प्रतिपदे पासून साईबाबांच्या आदेशाने मिराणे सर यांनी पहिले सामुदायिक पारायण बहात्तर भक्तांच्या उपस्थितीत सुरू केले. आणि म्हणता म्हणता यावर्षी या सामुदायिक पारायण सोहळ्यास एकतीस वर्षे पूर्ण झाली, सुमारे सात ते आठ हजार स्त्री पुरुष साईभक्त यामध्ये सामील होऊन सलग आठ दिवस पारायण करतात.
कुडाळ मधील ज्येष्ठ रंगकर्मी मा. विलास दादा कुडाळकर आणि मिराणे सर यांच्या स्नेहबंध यामुळे कुडाळेश्वर मित्रमंडळ यांचे एक अतूट नाते निर्माण झाले आहे.
नाट्य रसिक मंच शिर्डी संस्थापक मिराणे सर आणि शिर्डी ग्रामस्थ यांचे पुढाकारातून सुरू असलेल्या या सोहळ्यात कुडाळेश्वर मित्र मंडळ यांची भजन संगीत सेवा, लोककला, दशावतार, संगीत साई कथामृत ही नाट्यकलकृती ज्यामधून कुडाळ मधील अनेक कलाकारांना साई बाबांची भूमिका साकारता आली, तसेच दिंडीमध्ये आगळेवेगळे चित्ररथ देखावे, चलचित्र सादर करण्याची संधी मिळते,समस्त शिर्डीवासीय आणि भक्त गण यांची वाहवा मिळविणारे कुडाळेश्वर मित्रमंडळ यांच्या कार्यकर्त्यांनी तन मन अर्पून साकारलेले हे कार्यक्रम या दिंडीचे एक वेगळे वैशिष्ट्य असते.साईचरित्र सामुदायिक पारायण सोहळा हा मिराणे सरांच्या जीवनातील माइलस्टोन आहे. अगदी शिस्तबद्ध संयोजन, सांप्रदायिक वातावरण, धार्मिक अध्यात्मिक कार्यक्रम यामुळे शिर्डी या सोहळ्यात भक्ती गंगेत तल्लीन होते. शिर्डी बाहेरील भक्तगणांना ही तर आनंदाची पर्वणीच असते.
आणि साहजिकच या वर्षानुवर्षे अखंडीत चालत असलेल्या आणि पारायणकर्ते साई भक्त यांची वाढत चाललेली संख्या असे स्वरूप असलेल्या सोहळ्याची दखल सर्वांनीच घेतली आहे. शिर्डी आणि परिसरातील ग्रामस्थ, भक्तगण ,मीडिया, साई संस्थान या सर्वांनीच या सोहळ्यात सहभागी होवून कौतुक केले आहे.
मिराणे सरांच्या पुढाकाराने सुरू झालेल्या व या अखंडीत चालत आलेल्या सामुदायिक पारायण सोहळ्याचे एकतीसाव्या वर्षीचे औचित्य साधून पारायण समाप्ती सोहळ्यात नाट्य रसिक संचाचे संस्थापक व शिरडी तील सामुदायिक साई चरित्र पारायण सोहळ्याचे जनक श्री शांताराम मिराणे सरांचा विशेष सत्कार साईबाबा संस्थानचे मुख्य कार्यकारी अधिकारी भाप्रसे श्री गोरक्ष गाडीलकर यांचे हस्ते माजी विश्वस्त सचिन तांबे पाटील, मुकुंद गोंदकर, नितीन मिराणे, जनसंपर्क अधिकारी दीपक लोखंडे, शिर्डी ग्रामस्थ व पारायणकर्ते भक्त यांचे उपस्थितीत करण्यात आला.आणि या सोहळ्याचे साक्षीदार होण्याचे भाग्य कुडाळेश्वर मित्रमंडळ यांच्या कार्यकर्त्यांना लाभले.

संतोष कदम
9422435855