🛑सहावा वेतन आयोग त्रुटी दुरूस्तीसाठी प्रस्ताव: कुडाळ पं.स.कडून सादर..

▪️महाराष्ट्र राज्य प्राथमिक शिक्षक समिती शाखा कुडाळचा पाठपुरावा.

✍🏼लोकसंवाद /- कुडाळ.

दि. 01/01/2006 रोजी व त्यानंतर नामनिर्देशनाने नियुक्त झालेल्या कर्मचा-यांचे वेतन महाराष्ट नागरी सेवा (सुधारित वेतन) नियम 2009 च्या नियम 8 जोडपत्र 3 नुसार निश्चित करण्यांत येते. या तरतुदीमुळे दि. 1 जानेवारी, 2006 रोजी व त्यानंतर नामनिर्देशनाने नियुक्त झालेल्या कर्मचा-यांचे वेतन सेवाजेष्ठ कर्मचा-यांपेक्षा अधिक होत असल्याचे निदर्शनास आल्याचे महाराष्ट्र राज्य प्राथमिक शिक्षक समिती शाखा कुडाळने प्रशासनाच्या लक्षात आणून दिले होते.
एकाच संवर्गात दि.1 जानेवारी, 2006 पूर्वी पदोन्नत झालेले जेष्ठ कर्मचारी आणि दि.1 जानेवारी, 2006 रोजी अथवा तदनंतर पदोन्नत झालेले कनिष्ठ कर्मचारी तसेच दि. 1 जानेवारी 2006 पूर्वी नामनिर्देशनाने नियुक्त झालेले जेष्ठ कर्मचारी आणि दि. 1 जानेवारी, 2006 रोजी अथवा तदनंतर नामनिर्देशनाने नियुक्त झालेले कनिष्ठ कर्मचा-यांच्या वेतनातील तफावत दूर करण्यांबाबत शासन निर्णयान्वये आदेशित केलेले आहे.याची माहिती शिक्षक समितीने जिल्हा परिषद शिक्षण विभागाला सादर केली होती.

दिनांक १ जानेवारी, २००६ ते ३१ जानेवारी २०१६ या कालावधीत जे जेष्ठ कर्मचारी वेतन वाढवून देण्यांस पात्र आहेत,त्यांची संबंधित दिनांकापासून वेतन वाढवून वेतननिश्चिती करावयाची आहे.याबाबत उचित कार्यवाही करणेकरिता प्राथमिक शिक्षणविभागाने आदेशित केलेले होते. त्याचा विचार करता या त्रुटीमध्ये सहावा वेतन आयोग देताना 2002 मध्ये सेवाज्येष्ठ शिक्षण सेवक म्हणून सेवेत आलेल्या शिक्षकांना सुरूवातीचे वेतन 8370 दिले गेले. परंतु 2003-2004 च्या कनिष्ठ शिक्षण सेवकांना मात्र तेच सुरूवातीचे वेतन 8560 दिलेले आहे.त्यामुळे वरिष्ठ शिक्षकाच्या वेतनातील तफावत प्रत्यक्ष सेवापुस्तकात वित्त विभागाकडून तपासून घेऊन तसे प्रस्ताव शिक्षण विभागाकडे पाठविणे आवश्यक होते. तरच शिक्षण विभागाकडून एकत्रित प्रस्ताव मुख्य कार्यकारी अधिकारी यांचेकडे सादर करून वेतनात वाढ होईल. याची माहिती शिक्षक समिती कुडाळने प्राथमिक शिक्षकांना दिली.त्यातील काही जणांना 4500 बेसिकमुळे 8370 सहाव्या वेतन आयोगात सुरूवातीचे बेसिक मिळाले. त्यांच्यापेक्षा जास्त म्हणजे 8560 हे 2003 ,2004 मध्ये सेवेत लागलेल्यांना दिल्याने वरिष्ठ व कनिष्ठ कर्मचारी वेतन तफावत निर्माण झालेली लक्षात आली. म्हणून याबाबतच्या शासन आदेशाव्दारे त्यांना फरक व नवीन वेतन निश्चितीची मागणी महाराष्ट्र राज्य प्राथमिक शिक्षक  समिती शाखा कुडाळने केली होती.अशा बाधित त्रुटीग्रस्त सर्व प्राथमिक शिक्षकांचे प्रस्ताव सोबत योग्य पुराव्यासह पंचायत समिती कुडाळ यांनी जिल्हयाला पाठवले आहेत.अशी माहिती महाराष्ट्र राज्य प्राथमिक शिक्षक,समिती शाखा कुडाळ यांच्या कडून प्रसिद्धी पत्रकाच्या माध्यमातून देण्यात आली आहे.