🛑एसटी मध्ये आता व्हीटीएस यंत्रणा.;एका क्लिकवर कळणार एसटीचे लोकेशन.

✍🏼लोकसंवाद /- मुंबई.

राज्य परिवहन महामंडळाच्या (एसटी) बसमध्ये ‘व्हेइकल ट्रॅकिंग सिस्टिम’ (व्हीटीएस) यंत्रणा विकसित केली गेली आहे. या प्रणालीची यशस्वी चाचणी नुकतीच करण्यात आली आहे. त्यामुळे लवकरच प्रवाशांना बसचा ठावठिकाणा एका क्लिकवर पाहता येणार आहे. या यंत्रणेचा वापर करून एसटीच्या 16,000 हून अधिक बसांमध्ये याची अंमलबजावणी करण्यात आलेली आहे, ज्यात नवीन आणि जुनी दोन्ही प्रकारातील बसांचा समावेश आहे.

प्रायोगिक तत्त्वावर या यंत्रणेची चाचणी यशस्वी ठरली आहे. अॅप विकसित करण्याचे काम देखील सुरू आहे. रेल्वे प्रवाशांना त्यांच्या गाडीचे स्थान जसे कळते, तशाच प्रकारे ‘व्हीटीएस’ यंत्रणेमुळे आता प्रवाशांना आरक्षित किंवा अपेक्षित बसची माहिती एका क्लिकवर मिळू शकणार आहे. यामध्ये बस कोठे आहे, किती अंतरावर आहे, बस बिघडली आहे का नाही, किती विलंब होईल, या सर्व गोष्टी सहजपणे समजणार आहेत. मात्र व्हीटीएस यंत्रणा योग्य प्रकारे कार्यरत राहण्यासाठी खेड्यांतील रस्ते आणि इंटरनेट सुविधा अत्यंत गरजेच्या आहेत. डोंगराळ प्रदेश, घाट, पठार आणि बोगद्यांमध्ये इंटरनेटची सुविधा अनेकदा नसते, ज्यामुळे प्रवाशांना अडचणींचा सामना करावा लागेल.