🛑सिंधुदुर्गात मंत्री दीपक केसरकर,आमदार वैभव नाईक,आमदार नितेश राणे,माजी खासदार निलेश राणे यांची प्रतिष्ठा लागली पणाला.

✍🏼लोकसंवाद /- समिल जळवी सिंधुदूर्ग.

सिंधुदुर्ग जिल्ह्यात सावंतवाडी, कुडाळ आणि कणकवली हे तीन विधानसभा मतदारसंघ येत असून या सर्व मतदारसंघात यंदा मात्र मोठी उलथापालथ आहे. या तिन्ही मतदारसंघात शिक्षण मंत्री दीपक केसरकर,आमदार नितेश राणे,आमदार वैभव नाईक,माजी खासदार निलेश राणे यांच्यासह माजी आमदार राजन तेली,माजी नगराध्यक्ष संदेश पारकर ही मंडळी निवडणूक रिंगणात आहे.विशेष म्हणजे नुकत्याच झालेल्या लोकसभा मतदारसंघात सावंतवाडी,कुडाळ आणि कणकवली या तिन विधानसभा मतदारसंघात खासदार नारायण राणे यांना मोठे मताधिक्य मिळाले होते.आता लोकसभेची स्थिती कायम राहते की बदलते याकडे सर्वांचे लक्ष आहे.

*कुडाळमध्ये नारायण राणेंच्या त्या पराभवाचा बदला युती घेणार का?*

कुडाळ विधानसभा मतदारसंघात उबाठा शिवसेनेचे वैभव नाईक आणि शिंदे शिवसेनेचे निलेश राणे यांच्यात प्रमुख लढत आहे. कुडाळ विधानसभा मतदारसंघात मागील अनेक वर्षांपासून निलेश राणे हे प्रयत्न करत असून, हा मतदारसंघ शिवसेनेच्या वाट्याला आल्याने भाजपाचे खासदार नारायण राणे यांचे सुपुत्र आणि माजी खासदार निलेश राणे यांना शिवसेनेत प्रवेश देऊन त्यांना शिवसेना पक्षाच्यावतीने उमेदवारी देण्यात आली आहे. मात्र,या मतदारसंघात उबाठा शिवसेनेचे वैभव नाईक यांनी नारायण राणे यांचा पराभव करून हा मतदारसंघ शिवसेनेकडे आणला होता.परंतु, यावेळी वडिलांच्या पराभवाचा वचपा काढण्याची संधी निलेश राणेंकडे असून निलेश राणे हे वैभव नाईकला पाणी पाजतात का?याकडे सर्वांचे लक्ष लागले आहे. लोकसभा निवडणुकीत खासदार नारायण राणे यांना कुडाळ विधानसभेतच सर्वांधिक मते मिळाली आहे, त्याचा फायदा निलेश राणेंना होऊ शकतो आणि नारायण राणे यांच्या पराभवाचा वचपा काढण्याची संधी निलेश राणे आणि शिवसेना भाजपा युतीसमोर आहे.

*कणकवलीत नितेश राणेंसमोर संदेश पारकरांचे आव्हान ठरेल का?*

कणकवली, वैभववाडी,देवगड विधानसभा मतदारसंघात विद्यमान भाजपाचे आमदार नितेश राणे यांच्यासमोर संदेश पारकर या दोघांमध्येच ही प्रमुख लढत आहे. सन २०१४ मध्ये काँग्रेसच्या तिकीटावर निवडून आलेल्या नितेश राणे यांनी सन २०१९ मध्ये भाजपाच्या तिकीटावर निवडणूक लढवल्यानंतर याला शिवसेनेने विरोध करत सतीश सावंत यांना त्यांच्याविरोधात उभे केले होते. परंतु शिवसेनेचे आव्हान असतानाही नितेश राणे हे ८४ हजार मते मिळवत विजयी झाले होते. तर शिवसेनेच्या सतीश सावंत यांना ५६ हजार मतदान झाले होते. परंतु यंदाच्या निवडणुकीत शिवसेनेने नितेश राणे यांच्या विरोधात संदेश पारकर यांना उभे केले आहे. संदेश पारकर यांनी आव्हान निर्माण केले असले तरी संदेश पारकर यांचा मागील काही वर्षांपासून कणकवलीचा संपर्क तुटलेला आहे. त्यामुळे नितेश राणे यांच्यासमोर पारकर यांचे आव्हान किती असेल असा प्रश्न उपस्थित असेल.

*सावंतवाडीत दिपक केसरकरांपुढे राजन तेली आणि विशाल परबांचे आव्हान*

सावंतवाडी विधानसभा मतदारसंघात विद्यमान शिवसेना आमदार आणि मंत्री दीपक केसरकर यांच्या विरोधात भाजपाचेच आव्हान निर्माण झाले आहे. मागील निवडणुकीत अपक्ष निवडणूक लढणारे राजन तेली यांनी दिपक केसरकर यांना शह देण्यासाठी भाजपाला सोडचिठ्ठी देत उबाठा शिवसेनेत प्रवेश केला. त्यामुळे उबाठा शिवसेनेकडून राजन तेली मशाल चिन्हावर निवडणूक लढवत आहेत.तर आपल्याला ही जागा न मिळाल्याने भाजपाचे युवा मोर्चाचे प्रदेश उपाध्यक्ष असलेले विशाल परब यांनीही बंडेखारी करत दिपक केसरकर यांच्या विरोधात बंड केला आहे. त्यामुळे सावंतवाडी मतदारसंघातील तेल लावलेला पहेलवान म्हणून ओळखला जाणाऱ्या केसरकर यांच्यासमोर उबाठा शिवसेनेचे राजन तेली आणि भाजपाचे बंडखोर विशाल परब यांचे आव्हान असल्याने यंदा या चक्रव्युहातून दिपक केसरकर कसा विजयाचा मार्ग काढतात याकडे सर्वांचे लक्ष आहे.