🛑करुळ घाटाच्या निकृष्ट कामाची सखोल चौकशी करा !

✍🏼लोकसंवाद /- वैभववाडी.

राष्ट्रीय महामार्गाचा दर्जा मिळालेल्या रस्त्यावरील कोकण व पश्चिम महाराष्ट्राला जोडणाऱ्या करुळ घाटाच्या निकृष्ट कामाची उच्चस्तरीय सखोल चौकशी करावी, अशी मागणी राष्ट्रवादी काँग्रेस पक्ष शरदचंद्र पवार पक्षाचे तालुकाध्यक्ष रवींद्र चव्हाण यांनी खासदार अमोल कोल्हे यांच्याकडे निवेदनाद्वारे केली आहे राष्ट्रवादी काँग्रेस पक्षाची (शरद पवार गट) शिवस्वराज्य यात्रेनिमित्त डॉ. कोल्हे सावंतवाडी येथे आले असता त्यांच्याशी तळेरे कोल्हापूर राष्ट्रीय महामार्गावरील करुळ घाटाच्या निकृष्ट कामाची चर्चा केली. वैभववाडी तालुक्यातील तळेरे कोल्हापूर महामार्गावरील करुळ घाट रस्त्याचे बांधकाम जानेवारी २०२३ पासून सुरू करण्यात आले आहे. तेव्हापासून हा घाट मार्ग वाहतुकीस बंद आहे. या घाट रस्त्याचे काम निकृष्ट दर्जाचे सुरू असून या कामाकडे प्रशासनासह राजकीय पदाधिकाऱ्यांनी पूर्णपणे दुर्लक्ष केला आहे. यावर्षी बांधकाम केलेल्या सहा ते सात संरक्षण भिंती पावसाळ्यात कोसळल्या आहेत तसेच काँक्रिट केलेला रस्ता ही वाहून गेला आहे तर त्यानंतरही सध्या सुरू असलेले काम हे निकृष्ट दर्जाचे सुरू आहे. या घाटमार्गातून दररोज सुमारे ३२ हजार मेट्रिक टन वाहतूक होते. या निकृष्ट कामाची चौकशी होऊन आपल्या स्तरावर प्रयत्न व्हावेत व घाटाचे काम चांगल्या दर्जाचे व्हावे, अशी मागणी चव्हाण यांनी निवेदनाद्वारे कोल्हे यांच्याकडे केली आहे.