🛑कडावल भागात चोऱ्यांचे प्रमाण वाढल्याने ग्रामस्थांनी घेतली जिल्हाधिकारी,पोलीस अधीक्षक यांची भेट..

✍🏼लोकसंवाद /- ओरोस.

कडावल भागात चोऱ्यांचे प्रमाण वाढत आहे.अलिकडेच काहीजण कडावल ग्रामपंचायत हद्दीत येऊन विनापरवाना झोपड्या बांधून राहत असून बाजारपेठेत रात्री चोरी करण्याचा प्रयत्न करीत असताना एकाला पकडण्यात आले. अन्य दोघे पसार झाले. याबाबत कडावल व्यापारी संघटना व ग्रामस्थांनी निवेदनाद्वारे जिल्हाधिकारी, पोलीस अधीक्षक व तहसीलदार यांची भेट घेऊन या संदर्भात लक्ष वेधले आहे.
दरम्यान, कुडाळचे पोलीस उपनिरीक्षक भालेराव यांनी कडावल बाजारपेठ व्यापारी संघटनेच्या बैठकीत उपस्थिती दर्शवून व्यापाऱ्यांचे म्हणणे ऐकून घेतले. याबाबत चौकशी करून लवकरच कार्यवाही करण्यात येईल, असे आश्वासन त्यांनी दिले. आवळेगाव दूरक्षेत्राचे पोलीस कर्मचारी मंगेश जाधव, सुरज पवार, कुडाळ व्यापारी संघटना अध्यक्ष श्रीराम शिरसाट, उपाध्यक्ष गोविंद सावंत, कडावल पोलीस पाटील सोमा सावंत, गुरुनाथ मुंज, अमित कल्याणकर, संतोष भोगटे, सरपंच शीतल कल्याणकर उपस्थित होते. याबाबत येथील व्यापारी विजय अंबुरे यांनी पोलिसांत तक्रार दाखल केली आहे. नंदू मुंज यांनी आभार मानले.