🛑विनयभंग केल्याच्या आरोपातून शिक्षकाची निर्दोष मुक्तता: आरोपी तर्फे ॲड विवेक मांडकुलकर यांचा यशस्वी युक्तिवाद.

✍🏼लोकसंवाद /- सिंधुदुर्ग.

शाळकरी मुलीचा विनयभंग केल्याच्या आरोपातून संशयित आरोपी जगन्नाथ वासुदेव वजराटकर याची ओरोस येथील मे.विशेष न्यायाधीश सौ.सानिका जोशी यांनी सबळ पुराव्याअभावी निर्दोष मुक्तता केली. आरोपी तर्फे ॲड विवेक मांडकुलकर, ॲड प्रणाली मोरे, ॲड भुवनेश प्रभुखानोलकर यांनी काम पाहिले. तसेच ॲड वृषांग जाधव यांचे सहकार्य लाभले.
दिनांक ०९/०४/२०२२ रोजी वेंगुर्ला तालुक्यातील अणसूर खालचे शाळेतील विद्यार्थिनी कार्यानुभवच्या शिक्षकांनी सांगितले म्हणून शाळेच्या दरवाजाला बेंचवर चढून तोरण बांधत असताना आरोपीने छातीला हात लावला व मजा वाटते का विचारले अशी फिर्याद दिनांक ११/०४/२०२२ रोजी वेंगुर्ला पोलीस ठाणे येथे देण्यात आली होती. त्यानुसार भा. दं. वि कलम ३५४, ३५४अ(१)(iv),(i) तसेच बालकांचे लैंगिक अपराधांपासून संरक्षण अधिनियम,२०१२ चे कलम ८,१२ अन्वये गुन्हा नोंदविण्यात आला होता. सदर कामी सरकार पक्षातर्फे एकूण ६ साक्षीदार तपासण्यात आले होते. साक्षीदारांच्या जबाबातील विसंगती व आरोपी तर्फे ॲड विवेक मांडकुलकर यांनी केलेला युक्तिवाद ग्राह्य मानून संशयीत आरोपीची ओरोस येथील मे विशेष न्यायाधीश सौ सानिका जोशी यांनी सबळ पुराव्या अभावी निर्दोष मुक्तता केली.