🛑मत्स्यसंवर्धन प्रशिक्षणासाठी सिंधूरत्न योजनेतून अनुदान.; ना. दिपक केसरकर.

✍🏼लोकसंवाद /- कुडाळ.

मत्स्यव्यवसायाला कोकणात अमर्याद संधी आहेत आणि या दृष्टीने सिंधुदुर्गातील युवकांनी या क्षेत्रातील संधीचा लाभ घ्यावा या करीता गोड्यापाण्यातील व शोभिवंत मत्स्यसंवर्धनाला प्रोत्साहन देण्यासाठी सिंधूरत्न समृद्ध योजनेतून प्रशिक्षणासाठी अनुदान देऊन जिल्ह्यातील तरुणाना याकरीता प्रशिक्षण देऊन शाश्वत रोजगार व स्वयंरोजगार निर्मितीसाठी प्रयत्न करण्यात येणार असल्याचे सुतोवाच शिक्षण व मराठी भाषा मंत्री आणि सिंधुरत्न समृद्ध योजनेचे अध्यक्ष ना. दीपक केसरकर यांनी नुकत्याच सिंधुरत्न समृद्ध आणि चांदा ते बांदा योजनेचा आढावा घेताना केले आहे.

त्यांच्या या संकल्पनेतून तरुणांना रोजगार उपलब्ध व्हावा यासाठीच सिंधुरत्न समृद्ध योजनेतून मत्स्यबीज निर्मिती आणि शोभिवंत मत्स्य निर्मिती या करीता मुळदे येथील मत्स्य संशोधन व संवर्धन प्रकल्पाला मत्स्यबीज निर्मिती करीता प्रकल्प मंजूर करण्यात आलेले असून या हंगामात गोड्या पाण्यातील कटला/रोहू माशांचे बीज मुळदे येथील या मंजूर प्रकल्पातून निर्माण करण्यात आले असून जिल्ह्यातील मत्स्यशेती करणाऱ्या शेतकऱ्यांनी मत्स्यबीज उपलब्धतेसाठी व तांत्रिक तांत्रिक मार्गदर्शनासाठी डॉ.बाळासाहेब सावंत कोकण कृषी विद्यापीठ दापोली अंतर्गत मुळदे येथील मत्स्य संशोधन केंद्र, उद्यानविद्या महाविद्यालय येथे संपर्क साधावा असे आवाहन या केंद्राचे प्रमुख डॉ.नितीन सावंत यांनी केले आहे.