🛑चिपी येथील तरुणाचा पुराच्या पाण्यात बुडून मृत्यू..

✍🏼लोकसंवाद /- परुळे.

चिपी-भरणीवाडी येथील पांडुरंग दशरथ वाक्कर (५०) हे तेथीलच ओहोळाला आलेल्या पुराच्या पाण्यात पडून वाहून गेल्याने त्यांचा बुडून मृत्यू झाला. ही घटना सोमवारी दुपारी दोन ते रात्री आठ या मुदतीत घडली. पोलिसांनी आकस्मिक मृत्यू अशी नोंद केली आहे. याबाबतची खबर प्रकाश पुरुषोत्तम राणे (रा. कवठी) यांनी निवती पोलीस ठाण्यात दिली. पांडुरंग वाक्कर मोलमजुरी करायचे. काल ते प्रकाश राणे यांच्याकडे कामाला गेले होते. तेथून ते दुपारी आपल्या घरी यायला निघाले. त्यांच्या घरापासून साधारण एक किमी अंतरावर ओहोळ आहे. या ओहोळातून येत असताना त्यांना पुराच्या पाण्याचा अंदाज आला नसल्याने त्यांचा तोल जाऊन ते त्या पाण्यात पडले आणि वाहून गेले. सायंकाळी उशिरापर्यंत ते घरी पोहोचले नसल्याने त्यांची शोधाशोध सुरू झाली. काल रात्री आठच्या सुमारास ते त्या पांडुरंग वाक्कर ओहोळाच्या पाण्यातून येत होते. तेथून साधारण दोनशे मीटर अंतरावर ते ग्रामस्थांना मृतावस्थेत आढळले.
निवती पोलीस ठाण्यात खबर दिल्यानंतर सहाय्यक निरीक्षक भीमसेन गायकवाड यांनी घटनास्थळी भेट दिली. तसेच हवालदार पंढरीनाथ भांबरे यांनी पोलीस नाईक दीपक गावडे, होमगार्ड ओंकार सर्वेकर यांच्या मदतीने पंचनामा केला.
पदाधिकारी-ग्रामस्थांची धाव घटना समजताच शिवसेना (शिंदे गट)
उपजिल्हाप्रमुख सचिन देसाई, चिपीचे ग्रा.पं. माजी सदस्य संदेश करंगुटकर, मोहन वाक्कर, राजू राणे, राजू करंगुटकर व अन्य ग्रामस्थांनी धाव घेतली. मृतदेह नातेवाईकांच्या ताब्यात पांडुरंग यांचा मृतदेह रात्री उशिरा ओरोस येथील शवागृहात ठेवण्यात आला. त्यानंतर मंगळवारी सकाळी कुडाळ येथे ग्रामीण रुग्णालयाचे वैद्यकीय अधिकारी डॉ. वस्त यांनी विच्छेदन केल्यानंतर मृतदेह नातेवाईकांच्या ताब्यात देण्यात आला. पांडुरंग मोलमजुरी करून आपल्या कुटुंबाचा उदरनिर्वाह चालवित होते. त्यांच्या अकाली निधनाने कुटुंबाचा आधार हरपला आहे. शासनाकडून त्यांच्या कुटुंबियांना आर्थिक मदत मिळावी, अशी मागणी ग्रामस्थांमधून होत आहे. पांडुरंग यांच्या पश्चात पत्नी, मुलगा, मुलगी, भाऊ व अन्य परिवार आहे.