🛑केसरकर – तेलींच्या वादात भाजपा नेत्यांचे मौन का..?

1. ✍🏼लोकसंवाद /- राजन चव्हाण (पंचनामा)

शिंदे सेनेचे प्रवक्ते शालेय शिक्षणमंत्री दीपक केसरकर आणि भाजपाचे माजी आमदार, माजी जिल्हाध्यक्ष आणि ज्येष्ठ नेते राजन तेली यांच्यात गेल्या कांही महिन्यांपासून सुरू असलेला वाद आता अगदी विकोपाला गेला आहे.गेले काही दिवस तर दोन्ही नेते एकमेकांच्या विरोधात जाहीर टीका टिपण्णी करत आहेतच.पण त्यांचे पाठीराखे ,समर्थक, कार्यकर्तेही आपापल्या नेत्याच्या समर्थनार्थ जाहीर वक्तव्य करत आहेत.

दोघांमधील वाद हा आता इतक्या टोकाला गेला आहे की ते चक्क एकमेकांची हकालपट्टी करायला निघाले आहेत.’तेली हे सिंधुदुर्ग जिल्ह्यापुरते मर्यादित आहेत.त्यांना आमदार व्हायचे आहे म्हणून ते पातळी सोडून आपल्यावर
टीका करत आहेत ‘असं म्हणत आपण तेलींची भाजपा मधून हकालपट्टी करा अशी मागणी भाजपच्या वरिष्ठांकडे करणार आहोत असं केसरकर यांनी म्हटलंआहे.तर संतप्त झालेले तेली यांनी ‘केसरकर यांची मंत्रिपदावरून हकालपट्टी करा ‘ अशी जाहीर मागणी केलीच शिवाय लगेचच मुंबईला जाऊन त्यांनी मुख्यमंत्री एकनाथ शिंदे यांची भेट घेऊन शिक्षण खात्यातील गोंधळावर तसेच संच मान्यता, शिक्षक भरती,प्राथमिक व माध्यमिक शाळांचे प्रश्न यासंदर्भात एक निवेदन दिलं.

केसरकर यांच्याशी आपलं वैयक्तिक भांडण नाही.मतभेद आहेत ते त्यांच्या शालेय शिक्षण खात्याच्या संदर्भात.जे निर्णय झाले आहेत, ते, कोकणावर, रत्नागिरी – सिंधुदुर्ग जिल्ह्यांवर अन्याय करणारे आहेत असा आरोप तेली यांनी केला आहे.शिवाय केसरकर यांनी आतापर्यंत अनेक आश्वासने दिली,घोषणा केल्या, मात्र या आश्वासनांची पूर्तता केलेली नाही.घोषणांची अंमलबजावणी केली नाही असा तेली यांचा आरोप आहे.खरं तर या आरोपांना केसरकर यांनी उत्तर द्यायला हवे.

भाजपा – शिंदे सेना आणि अजित पवारांचा राष्ट्रवादी पक्ष हे महायुतीतील घटकपक्ष आहेत.युतीचा. धर्म पाळणं ही सर्वांचीच जबाबदारी आहे.मात्र आघाड्यांच्या सरकारमध्ये गेल्या कांही वर्षांमध्ये हे होत नाही असं दिसून आलं आहे.आघाडी असली तरी त्यातला घटक पक्ष स्वतःची ताकद वाढावी,केलेल्या कामाचं श्रेय पक्षाला मिळावं यासाठी कुरघोडीचं राजकारण करणार.त्यात कांही वावगं आहे असं वाटतं नाही.आघाडी असली तरी प्रत्येक घटक पक्ष आपला पक्ष वाढवण्यासाठी प्रयत्न करणारच हे ओघानं आलंच.

तेली हे मूळ शिवसेनेच्या मुशीतून तयार झालेले कार्यकर्ते,नेते.तेली, जी.जी उपरकर ,संजय पडते, काका कुडाळकर हे तसे उत्तम संघटक.संघटनेचे काम करताना अगदी तळाच्या कार्यकर्त्यांशी थेट संपर्क.जिल्हा भाजपाचे अध्यक्ष होताच तेली यांनी कणकवलीतून आपला मुक्काम हलवला आणि थेट सावंतवाडीत दाखल झाले.अध्यक्षपदाच्या आपल्या संपूर्ण कारकिर्दीत त्यांनी सेनेशी टक्कर देत भाजपा संघटना अगदी गावागावात रुजवली.हे करत असतानाच त्यांनी सावंतवाडी विधानसभा मतदारसंघाची बांधणी सुरू केली. कांही महिन्यापूर्वी त्यांनी अध्यक्षपद सोडलं असलं तरी संघटना बांधणी,सर्वसामान्य कार्यकर्ते आणि लोकांची कामं ते तितक्याच जोमानं आजही करत आहेत.आता तर त्याने सावंतवाडी विधानसभा मतदारसंघ भाजपाला मिळावा असा आग्रह धरला आहे.तशी मागणी केली आहे.आणि म्हणूनच दोघांमधील संघर्षाचं हेच मूळ आहे, कारण आहे.आता तर अजित पवारांच्या राष्ट्रवादी काँग्रेसने या मतदारसंघावर दावा केला आहे.त्यांच्या पक्षाच्या कोकण विभागीय नेत्या अर्चना घारे – परब यांनी गेल्या वर्षभरापासून कामाला सुरुवात केली आहे.

राष्ट्रवादीतून बाहेर पडून सेनेत दाखल झालेले आणि त्यानंतर लगेचच मंत्री झालेले केसरकर यांचा असा दावा आहे की आपण सेनेत आल्यानंतर जिल्ह्यात सेना आपण वाढवली.मात्र त्यानंतर मूळ सेनेतून बाहेर पडल्यानंतर पुन्हा मंत्रिपद मिळाल्यानंतर त्यांनी शिंदे सेना किती वाढवली..? भाजपाच्या कार्यकर्त्यांच्या या प्रश्नाचं उत्तर लोकसभा निवडणुकीत भाजपाचे नारायण राणे आणि ऊबाठा सेनेचे विनायक राऊत यांना सावंतवाडी मतदारसंघात जी मतं मिळाली त्यात आहे. केसरकर यांच्यासोबत काही मूठभर नेते व प्रमुख कार्यकर्तेच बाहेर पडले.सैन्य मात्र तिथंच राहिलं.रत्नागिरीत सुद्धा अशीच काहीशी स्थिती आहे.

तेलींची भाजपमधून हकालपट्टी करावी अशी मागणी आपण भाजपा नेतृत्वाकडे करणार आहोत असं सांगताना तेली यांचे पराभूत खासदार विनायक राऊत यांच्याशी सूर जुळतांना दिसत आहेत.असं विधान केलं.म्हणजे काय तर तेली हे उद्या सावंतवाडी विधानसभा मतदार संघातून सेनेच्या तिकिटावर लढू शकतात.गेले वर्षभर ही चर्चा आहे.केसरकर यांच्या विरुद्ध एक सक्षम स्पर्धक उभा राहतो आहे म्हणून कदाचित त्यांना बदनाम

करण्याचा हा एक डाव असावा असं तेली समर्थकांचं म्हणणं आहे.ही शक्यता अधिक वाटते.मात्र तेली यांच्या मागणीप्रमाणे उद्या जर हा मतदारसंघ भाजपाच्या वाट्याला आला.भाजपानं त्यावर हक्क सांगितला तर मग ही सारी चर्चा,दावे – प्रतिदावे फोल ठरतात.

मला आमदार करावे की करू नये हे सर्वस्वी जनतेच्या हातात आहे.या केसरकर यांच्या दाव्याला,विधानाला सर्वांचाच आक्षेप आहे.एखादा उमेदवार निवडणूक लढवतो तेव्हा पक्षाचं चिन्ह,सहकारी, तळागाळातील कार्यकर्ते,आघाडीतील घटक पक्षांचे नेते,कार्यकर्ते यावरच त्या उमेदवाराचं यश अवलंबून असतं.पण केसरकर यांना हे बहुदा मान्य नसावं. असं जर आहे तर मग केसरकर यांनी अपक्ष म्हणून निवडणूक लढवावी आणि जिंकून दाखवावी असं आव्हान भाजपा व अन्य विरोधी पक्षांच्या कार्यकर्त्यांनी दिलं आहे.

केसरकर – तेली यांच्यातील हा वाद बराच काळ सुरू आहे,गेल्या १५ दिवसात तर तो टोकाला गेला आहे.अशा स्थितीत तो मिटावा यासाठी दोन्ही बाजूनं कोणीच कसं पुढे येत नाही.भाजपा हा कडक शिस्त पाळणारा पक्ष ,अशा वेळी जिल्हास्तरावरील नेते,राज्य पातळीवरील नेते,प्रदेशचे पदाधिकारी,आमदार, खासदार,पालकमंत्री सारेच कसे मौन बाळगून आहेत. त्यांचं हे मौन बरंच काही सांगून जातं.

विधानसभा निवडणुका जसजशा जवळ येतील तसतशा राजकीय घडामोडी वेगानं घडतील.गुप्तचर संघटना कामाला लागल्या आहेत.कोणाला जवळ घ्यायचं,कोणाला दूर लोटायचं,हे ठरतंय.जागा वाटप ढोबळपणे ठरलं आहे. भाजपांतर्गत कार्यकर्ते,नेते यांच्यास्त स्वबळाची भाषा सुरू झाली आहे.आज जे सोबत आहेत त्यांच्यामुळं लोकसभा निवडणुकीत फार मोठं नुकसान झालं आहे.आता तरी शहाणे होऊया असा एकूण सूर कार्यकर्त्यांमध्ये आहे.म्हणूनच म्हणतो ‘आगे आगे देखो होता है क्या…?’

राजन चव्हाण  – ज्येष्ठ पत्रकार.83900 06191