🛑राहुल गांधी यांचे लोकसभा सदस्यत्व रद्द करा ! राष्ट्रप्रेमी नागरिक मंच कुडाळची राष्ट्रपतींकडे मागणी.

लोकसंवाद /- कुडाळ.

संसदेत नुकत्याच झालेल्या एका चर्चेच्या वेळी काँग्रेसचे लोकसभेतील विरोधी पक्षनेते राहुल गांधी यांनी हिंदूंविषयी केलेल्या अत्यंत आक्षेपार्ह वक्तव्यामुळे त्यांचे लोकसभा सदस्यत्व रहित करून त्यांच्यावर कठोर कायदेशीर कारवाई करावी, अशी मागणी भारताच्या राष्ट्रपतीकडे राष्ट्रप्रेमी नागरिक मंच कुडाळच्या वतीने करण्यात आली. या मागणीचे निवेदन कुडाळ निवासी नायब तहसीलदार श्री. प्रतिक आढाव यांना देण्यात आले.

या निवेदनात म्हटले आहे, राहुल गांधी यांच्या वक्तव्यामुळे कोट्यवधी हिंदूंना वेदना झाल्या आहेत. त्यांनी हिंदूंना हिंसक, खोटारडे, आणि द्वेष निर्माण करणारे, असे संबोधले आहे. त्यामुळे आमच्यासह देशभरातील कोट्यवधी हिंदूंच्या भावना दुखावल्या गेल्या आहेत. त्यामुळे देशभर हिंदूंमध्ये संतापाची एक लाट निर्माण झाली आहे. हे वक्तव्य लोकसभेतून दूरचित्रवाहिन्यांद्वारे थेट प्रक्षेपण झाल्यामुळे जगभरातील लोकापर्यंत पोचले आहे. त्यामुळे जगभरात सहिष्णु हिंदु समाजाची नाहक अपकीतीं झाली आहे.

काँग्रेसचे नेते राहुल गांधी यांनी अथवा त्याच्या काँग्रेस पक्षाने पहिल्यांदाच असे वक्तव्य केले आहे असे नाही, तर यापूर्वी काँग्रेसने भगवा आतंकवाद किंवा हिंदु आतंकवाद अशा संकल्पना मांडण्याचा प्रयत्न केला आहे. एकूणच हिंदूंना अपकीर्ती करण्याचा डाव काँग्रेस आखत आहे असे दिसून येते.

एकीकडे हिंदूंना हिंसक म्हणणारे राहुल गांधी वर्ष १९९० च्या दशकात काश्मिरी हिंदूंना काश्मीरमधून कुणी विस्थापित केले ? कोणत्या समाजाने हे विस्थापन केले ? हे राहुल गांधी सांगतील का ? ‘सर तन से जुदा’चा फतवा काढून देशभर अनेक हिंदूंचे गळे कापणारे कोण होते, हे राहुल गांधी सांगतील का ? मणीपूरमध्ये सहस्रो सहिष्णु मैतेई समाजावर आक्रमण करून त्यांना विस्थापित करणारे कोण होते ? हे राहुल गांधी कधी का सांगत नाहीत ?

संपूर्ण विश्व जिहादी आतंकवादाने त्रस्त आहे, लाखो लोक मारले गेले आहेत; पण या आतंकवादाचा रंग कोणता ? हे राहुल गांधी यांनी कधी सांगितलेले नाही. सर्वांत प्राचीन असलेला हिंदु धर्म हा सहिष्णु असल्यामुळे त्याने अन्य पंथियांप्रमाणे कधी साम्राज्य विस्तारासाठी अथवा धर्मपरिवर्तनासाठी इतरांवर आक्रमण केले नाही. उलट हिंदु समाज आज सार्वत्रिक शांतता आणि कल्याण यांच्या विचारधारेसाठी ओळखला जातो. या समाजावर हिंसक, खोटारडा, द्वेष्टा किंवा आतंकवादी म्हणून शिक्का मारणे, ही त्याची प्रतिमा अपकीर्त करण्याचा प्रयत्न आहे.

एका राष्ट्रीय पातळीवरील नेत्याकडून लोकशाहीच्या मंदिरात करण्यात आलेले हे विधान अत्यंत अनुचित आणि समाजात फूट पाडणारे आहे. तसेच हिंदु समाजाविषयी देशभर घृणेचे आणि द्वेषाचे वातावरण निर्माण झाले आहे. या आक्षेपार्ह विधानामुळे देशातील एकतेला धक्का बसला आहे. देशातील सामंजस्य आणि शांतता यांसाठी हा एक मोठा अडथळा निर्माण झाला आहे. यावर राहुल गांधींनी जे स्पष्टीकरण दिले आहे, ते न पटणारे आहे.

त्यामुळे त्यांनी हिंदु समाजाची सार्वजनिकरित्या क्षमा मागितली पाहिजे. त्यांच्यावर कठोर कारवाई होणे अत्यंत आवश्यक आहे. त्यामुळे आमची मागणी आहे की, राहुल गांधी यांचे लोकसभेचे सदस्यत्व तात्काळ रहित करण्यात यावे. समाजात भेद, द्वेष निर्माण करणाऱ्यांना अशा लोकांना निवडणूक लढवण्यासाठी कायमस्वरूपी बंदी घालावी ! अशी मागणी निवेदनाच्या माध्यमातूनच करण्यात आलेली आहे

यावेळी शिवसेना शिंदे गट कुडाळ तालुकाध्यक्ष बंटी तुळसकर, भाजपाचे स्वीकृत नगरसेवक गणेश भोगटे,सर्वश्री विवेक पंडित,मिलिंद देसाई, घनश्याम परब,उमेश वैद्य,प्रथमेश कुडाळकर,गौरव म्हापणकर, प्रथमेश म्हापणकर, प्रथमेश कवठकर,विकास पटवर्धन,वैभव शेणई, वसंतराव खाडे,दैवेश रेडकर, कुणाल पांचाळ,धीरज पांचाळ,श्रीकृष्ण शिरोडकर,प्रसादजी ठाकूर आणि रमाकांत नाईक आदी राष्ट्रप्रेमी नागरिक उपस्थित होते.

बजरंग दलाच्या वतीने कुडाळ पोलीस स्थानकामध्ये राहुल गांधी यांच्यावरती हिंदू संदर्भात बेजबाबदार वक्तव्य केल्याबद्दल कारवाई करावी यासंदर्भात निवेदन देण्यात आले.