🛑वेटिंग लिस्टवरील तिकिटांवर आता रेल्वे प्रवास बंद..

✍🏼लोकसंवाद /- मुंबई.

मुंबईहून ये-जा करणार्‍या लांब पल्ल्‌यांच्या गाड्यांतून प्रतीक्षायादीतील कन्फर्म नसलेल्या तिकिटांवर रेल्वे प्रवाशांना आता प्रवास करता येणार नाही. आरक्षित डब्यातील गर्दीचा व्हिडीओ व्हायरल झाल्यावर मध्य रेल्वेने कठोर पावले टाकली आहेत. आरक्षित डब्यातील गर्दी कमी करण्यासाठी विनातिकीट आणि प्रतीक्षायादीतील प्रवाशांवर दंडात्मक कारवाई करून प्रवासादरम्यान कोणत्याही स्थानकांवर उतरवण्याची कारवाई सुरू केली आहे.

छत्रपती शिवाजी महाराज टर्मिनस, दादर, लोकमान्य टिळक टर्मिनसवरून सुटणार्‍या लांब पल्ल्‌यांच्या रेल्वेगाड्यांमध्ये मोठ्या प्रमाणात गर्दी होत आहे. गर्दीमुळे तिकीटधारक प्रवाशांना मेल-एक्स्प्रेस मध्ये प्रवेश करता येत नाही. डब्यात प्रवेश केल्यानंतर आरक्षित आसनापर्यंत जाण्यासाठी त्रास सहन करावा लागतो. व्हायरल व्हिडीओची गंभीर दखल रेल्वे मंत्रालयाकडून घेण्यात आली आहे. त्यामुळे योग्य तिकीट नसलेल्या प्रवाशांना प्रवासादरम्यानच स्थानकांवर उतरवण्यात येत आहे.

‘गाडी क्रमांक ११०५९ लोकमान्य टिळक टर्मिनस ते छपरा एक्स्प्रेसमधून सर्वाधिक २८२ प्रवाशांना स्थानकांवर उतरवण्यात आले.(११०६१) जयानगर एक्स्प्रेसमधून २०० प्रवाशांना उतरवण्यात आले आहे. मुंबईतून सुटणार्‍या ३१ मेल-एक्स्प्रेसची तपासणी केल्यानंतर सुमारे १,६०० प्रवाशांना विविध स्थानकात उतरवण्यात आले आहे’, असे मध्य रेल्वेचे मुख्य जनसंपर्क अधिकारी डॉ. स्वप्नील नीला यांनी सांगितले.