🛑खासगी मोबाईल कंपन्यांच्या तुलनेत बीएसएनएल ची सेवा आजही अव्वल..

✍🏼लोकसंवाद /- सावंतवाडी.

सिंधुदुर्ग जिल्ह्यात बीएसएनएल कंपनी मोबाईल सेवा देण्यात आजही आघाडीवर आहे.खासगी कंपन्यांची – स्पर्धा असली तरी जिल्ह्यात बीएसएलएलचे साडेचार लाख मोबाईलधारक तर ५६ हजाराहून अधिक लॅण्डलाईनधारक आहेत. बीएसएनएल ‘मेक इन इंडिया’ अंतर्गत देशी तंत्रज्ञानाचा वापर करत आहे. तरीही बीएसएनएल विदेशी तंत्रज्ञान वापरणाऱ्या खासगी कंपन्यांच्या तुलनेत जिल्ह्यात आघाडीवर आहे. फाईव्ह-जी स्पीड देण्यासाठी यंत्रणेत आवश्यक तो बदल करण्यात आला आहे, अशी माहिती दूरसंचारचे सिंधुदुर्ग जिल्हा प्रबंधक आर. व्ही. जन्नू यांनी येथे दिली. नव्याने १५६ टॉवर उभारले

जाणार आहे. २४५ टॉवर कार्यरत आहेत. त्यातील बॅटरीच्या समस्येमुळे शंभरपेक्षा जास्त टॉवर अडचणीत आहेत, परंतु त्यांचे पुनरुज्जीवन करण्यासाठी प्रयत्न सुरू आहेत. कितीही खासगी कंपन्या आल्या तरी बीएसएनएलला मानणारे लोक आजही आहेत. बीएसएनएलच्या मोबाईल ग्राहकांची संख्या साडेचार लाख आहे. ऑप्टिकल केबलवरून सेवा घेणारे ग्राहक ११ हजार आहेत. कंत्राटी कर्मचाऱ्यांचे पगार वेळेत व्हावेत, यासाठी आमचे प्रयत्न सुरू आहेत. रिक्त असलेली कार्यालयीन पदे भरण्याची मागणी केली आहे. ती पदे भरली गेल्यास अधिकची चांगली सेवा देण्याचा आमचा मानस आहे, असेही ते म्हणाले. जिल्ह्यातील दूरसंचारच्या सद्यस्थितीबांबत विचारले असता जन्नू बोलत होते.