🛑लक्झरी कारमधून दारु वाहतूक करणारे कणकवलीतील दोघे जण एलसीबी पोलिसांच्या ताब्यात.; दारुसह 38 लाखाचा मुद्देमाल जप्त…

✍🏼लोकसंवाद /- सावंतवाडी.

मुंबई गोवा महामार्गावरुन फार्च्यूनर कार व स्विफ्ट कार यामधून गोवा बनावटीच्या दारुची अवैध वाहतूक गोव्याकडून मुंबईच्या दिशेने होणार असल्याच्या गोपनीय माहितीनुसार स्थानिक गुन्हे अन्वेषण शाखा सिंधुदुर्गच्या पथकाने सापळा रचून या दोन गाड्यांवर कारवाई करत दोघांना ताब्यात घेतले. तर ८ लाख ३२ हजार ८०० रुपयांच्या दारूसह ३० लाख रुपये किमतीच्या दोन गाड्या मिळून एकूण ३८ लाख ३२ हजार ८०० रुपयांचा मुद्देमाल जप्त केला.

मुंबई गोवा महामार्गावरून दोन आलिशान गाड्यांमधून गोवा बनावटीच्या दारूची अवैध वाहतूक होणार असल्याची खबर स्थानिक गुन्हे अन्वेषण विभागाला प्राप्त झाली होती. या गोपनीय माहितीच्या आधारे सापळा रचून स्थानिक गुन्हे अन्वेषण विभागाच्या सिंधुदुर्ग पथकाने फॉर्च्यूनर कार (क्र.एम एच ०१ – बीसी – १६१६ व स्विफ्ट कार क्र. एम एच ०७ – एबी ५३५४ हया गाडयांवर कायदेशीर कारवाई केली. त्यामध्ये ८ लाख ३२ हजार ८०० रुपये किमतीची गोवा बनावटीची दारु व ३० लाख रुपये किमतीच्या २ कार असा एकूण ३८ लाख ३२ हजार ८०० रुपये किमतीचा मुद्देमाल जप्त केला. तर सदर कारवाईमध्ये चेतक भरत वाळवे, (वय २७ रा. तिवरे वाळवेवाडी, ता. कणकवली व महेश्वर हनुमंत मोरे (वय ३७ रा. कलमठ मोरेश्वरनगर, ता. कणकवली ) यांना अटक करण्यात आलेली असून पुढील तपास सावंतवाडी पोलीस ठाण्याकडून चालू आहे.

सदरची कारवाई सिंधुदुर्ग पोलीस अधीक्षक सौरभ कुमार अग्रवाल, तसेच अपर पोलीस अधीक्षक नितीन बगाटे, पोलीस निरीक्षक संदिप भोसले, सहा. पोलीस निरीक्षक महेंद्र घाग यांच्या मार्गदर्शनाखाली पोलीस हेड कॉन्स्टेबल प्रकाश कदम, आशिष गंगावणे, प्रमोद काळसेकर, पोलीस नाईक चंद्रकांत पालकर व चंद्रहास नार्वेकर यांचे पथकाने केली. सिंधुदुर्ग पोलीस अधीक्षक सौरभ कुमार अग्रवाल व अपर पोलीस अधीक्षक नितीन बगाटे, यांनी जिल्हयातील सर्व उप विभागीय पोलीस अधिकारी, सर्व पोलीस ठाणे प्रभारी अधिकारी व स्थानिक गुन्हे अन्वेषण शाखा, सिंधुदुर्ग यांना सिंधुदुर्ग जिल्ह्यातील अवैध धंदयांचे समूळ उच्चाटन करुन अवैध धंदयांमध्ये गुंतलेल्या इसमांवर कडक कायदेशीर का करण्याबाबतचे निर्देश दिलेले असून त्यानुसार जिल्ह्यात कारवाईंचे सत्र सुरू आहे याच पाश्र्वभमीवर ही कारवाई करण्यात आली आहे.