🛑”वादग्रस्त” ठरलेला कणकवलीतील साडी सेल पुन्हा होणार सुरू ! “राणे स्टाईल” नंतर सेल करण्यात आला होता बंद..

▪️कणकवली नगरपंचायत कडून “सेल” साठी रितसर परवानगी..

✍🏼लोकसंवाद /- कणकवली.

कणकवलीत दोन आठवड्यापूर्वी बंद झालेला व कणकवलीत “वादग्रस्त” ठरलेला अरविंद साडी सेल अखेर पुन्हा एकदा सुरू होण्याचा मार्ग तूर्तास तरी मोकळा झाला आहे. सावंतवाडी पाठोपाठ कणकवली शहरामध्ये 29 ऑगस्ट ते 12 सप्टेंबर पर्यंत च्या कालावधीत पूर्वी असलेल्याच कॉलेज रोडवरील लक्ष्मी विष्णू हॉलमध्ये हा साडी सेल सुरू होणार आहे. याकरिता सदर हॉलच्या व्यवस्थापकाला नगरपंचायत कणकवली कडून परवानगी देण्यात आली आहे. कणकवली प्रभारी मुख्याधिकारी पारितोष कंकाळ यांनी या वृत्ताला दुजोरा दिला आहे. त्यामुळे आता पुन्हा एकदा कणकवलीतील कापड व्यवसायिकांची काय भूमिका असणार? ते पाहणे महत्त्वाचे असणार आहे. आमदार नितेश राणे यांनी आपली स्टाईल दाखवल्यानंतर हा सेल बंद करण्यात आला होता. मात्र त्यानंतर सर्वसामान्य जनतेमधून सेल सुरू करण्याची मागणी पुढे येत होती. या पार्श्वभूमीवर नगरपंचायत चे माजी गटनेते सुशांत नाईक व माजी आमदार परशुराम उपरकर यांनी आमदार नितेश राणेंवर सेल बंद करायला लावल्याबद्दल जोरदार टीका केली होती. त्यानंतर याबाबत कापड व्यापारी संघटने कडून आपली भूमिका जाहीर करण्यात आली. मात्र हा सेल त्यावेळी कणकवलीतून गेल्यानंतर तूर्तास या विषयावर पडदा पडला होता. मात्र काही दिवसांपूर्वीच सावंतवाडी मध्ये हा सेल सुरू झाल्यानंतर व त्यानंतर आता पुन्हा ज्या कणकवली मध्ये सेल बंद झाला त्याच कणकवलीमध्ये पुन्हा तोच सेल सुरु होत असल्याने आता या सेलच्या सुरू होण्याकडे कणकवली तालुका वासीयांचे लक्ष लागून राहिले आहे. या सेलमध्ये स्वस्त दरात कापडी वस्तू विक्री करता ठेवण्यात आल्या होत्या. यामध्ये ब्लॅंकेट, उशी, टॉवेल, साड्या, पायपुसणी यासह अन्य अनेक कापडी वस्तूंचा समावेश होता. यामुळे खरेदी करिता मोठ्या प्रमाणावर गर्दी उसळली होती. या सेलमध्ये बिल करण्याकरिता लाईन लागलेली असायची. मात्र कणकवली शहरातील कापड व्यापाऱ्यांनी आमचे नुकसान होत असल्याचा आरोप करत गणेश चतुर्थीच्या तोंडावर आमचा व्यवसाय होत नसल्याने या सेल ला विरोध केला व त्यानंतर आमदार नितेश राणेंनी आपली स्टाईल दाखवल्या नंतर हा बंद झालेला हा सेल आता पुन्हा सुरू होण्याच्या दृष्टीने परवानगीची प्रक्रिया पूर्ण झाली आहे. त्यामुळे या सेल बाबत अनेकांना उत्सुकता लागली आहे. पहिल्यासारख्या तुडुंब गर्दीमध्ये सेल चालतो की कसे ते पाहणे आता महत्त्वाचे असणार आहे.