🛑पिंगुळी पाझर तलाव प्रश्न आता हरित लवादाच्या कोर्टात.

✒️लोकसंवाद /- कुडाळ.

कुडाळ तालुक्यातील पिंगुळी येथील पाझर तलाव प्रकरणी ग्रामस्थांची उपोषण मागे घेतले असले तरीही आवाज फाउंडेशन च्या माध्यमातून स्टॅलिन दयानंद व माजी आमदार परशुराम उपरकर यांनी हरित लवादाकडे दावा दाखल केला आहे.त्यामुळे हरित लवादाच्या पुढील निर्णयाकडे सर्वांचे डोळे लागून राहिले आहेत.पिंगळी येथील पाझर तलावालगतच्या जमिनीवर प्रस्तावित असलेल्या 275 बंगल्यांच्या बांधकामांना विरोध करत जिल्हा परिषद सदस्य गंगाराम सडवेलकर यांच्या सहित सर्वपक्षीय पदाधिकारी या सर्वांनी एकत्रित रित्या बेमुदत उपोषण सुरू केले होते. दरम्यान पाझर तलाव परिसरात सुरू असलेली बांधकामे थांबवण्याचे व रस्ते खुले करण्याचे आदेश प्रांत अधिकाऱ्यांनी संबंधित कंपनीला लेखी स्वरूपात दिल्यानंतर पाचव्या दिवशी उपोषण मागे घेण्यात आले होते.दरम्यान या प्रकरणी आवाज फाउंडेशनचे स्टॅलिन दयानंद यांनी संपूर्ण प्रकरणाची माहिती घेत सदर प्रकरणी हरित लवादाकडे दावा दाखल केला आहे.त्यामुळे पिंगळी पाझर तलाव वाचविण्या सोबतच पर्यावरणदृष्ट्या एकूण परिस्थितीचा अभ्यास करूनच आता याबाबत पुढील निर्णय होणार असल्याने हरित लवादाच्या निर्णयाकडे सर्वांचे लक्ष लागून राहिले आहे.