🛑भुयारी गटार योजनेच्या अपयशावरून वैभव नाईक यांनाही प्रश्न विचारा; महेश कांदळगांवकर यांचा म्हाडगुत यांना सवाल.

✒️लोकसंवाद /- मालवण.

मालवण नगरपरिषदेच्या रखडलेल्या भुयारी गटार योजनेवरून राजकीय आरोप-प्रत्यारोपांना पुन्हा सुरुवात झाली आहे. माजी नगराध्यक्षांच्या कार्यकाळातील अपयशावर प्रश्न उपस्थित करणाऱ्यांनी तत्कालीन आमदार वैभव नाईक यांच्या दहा वर्षांच्या आमदारकीच्या काळात ही योजना पूर्ण का होऊ शकली नाही, याचेही उत्तर द्यावे, असा सवाल माजी नगराध्यक्ष तथा स्वीकृत नगरसेवक महेश कांदळगांवकर यांनी केला आहे. ‘एक बोट आमच्याकडे दाखवता, चार बोटे तुमच्याकडे आहेत’, अशा शब्दांत त्यांनी म्हाडगुत यांच्यावर निशाणा साधला.मालवण नगरपरिषदेची भुयारी गटार योजना 2012 पासून सुरू झाली. मात्र, विविध अडचणींमुळे गेल्या बारा ते तेरा वर्षांतही ही योजना पूर्ण होऊ शकलेली नाही. 2016 ते 2021 या नगराध्यक्षपदाच्या कार्यकाळात प्रयत्न करूनही योजना पूर्ण करता आली नाही, याची आम्ही त्यावेळीच जाहीरपणे कबुली दिली होती. चांगल्या कामाचे श्रेय घेताना प्रलंबित कामांची जबाबदारीही स्वीकारली पाहिजे, अशी आमची भूमिका असल्याचे कांदळगांवकर यांनी स्पष्ट केले.