🛑पत्नीला आत्महत्येस प्रवृत्त केल्याप्रकरणी गुन्हा मृत्यूचे गूढ उकलण्याचे कणकवली पोलिसांसमोर आव्हान.

✒️लोकसंवाद /- कणकवली.

महिला पोलीस हवालदार स्मिता सचिन माने यांच्या मृत्यू प्रकरणात अटक करण्यात आलेले त्यांचे पती तथा पोलीस कॉन्स्टेबल सचिन अशोक माने याला न्यायालयाने गुरुवारपर्यंत पोलीस कोठडी सुनावली आहे. स्मिता यांच्या मृत्यूमागील नेमके कारण शोधण्यासाठी आणि तक्रारीतील आरोपांची पडताळणी करण्यासाठी पोलिसांकडून तपास सुरू आहे.

◼️९ ऑक्टोबरपासून स्मिता माने बेपत्ता

स्मिता माने या ९ ऑक्टोबरपासून कलमठ येथील राहत्या घरातन बेपत्ता झाल्या होत्या त्यानंतर रविवार ११ ऑक्टोबर रोजी बिडवाडी-हुंबरणे येथील गांगेश्वर मंदिराच्या मागील जंगलमय परिसरात झाडाच्या फांदीला गळफास घेतलेल्या अवस्थेत त्यांचा मृतदेह आढळून आला होता. या घटनेमुळे परिसरात खळबळ उडाली होती. स्मिता यांच्या मृत्यूचे नेमके कारण काय, याबाबत सुरुवातीपासूनच प्रश्न उपस्थित केले जात होते.

◼️बहिणीच्या फिर्यादीवरून पतीविरोधात गुन्हा.

स्मिता यांच्या बहिणी रेश्मा जाधव यांनी दिलेल्या फिर्यादीवरून त्यांचे पती सचिन माने यांच्याविरोधात कणकवली पोलीस ठाण्यात गुन्हा दाखल करण्यात आला. पोलीस ठाणे गुन्हा रजिस्टर क्रमांक २४८/२६ अन्वये आत्महत्येस प्रवृत्त केल्याप्रकरणी गुन्ह्याची नोंद करण्यात आली आहे. फिर्यादीत सचिन माने यांच्याकडून स्मिता यांचा शारीरिक व मानसिक छळ तसेच मारहाण होत असल्याचे आरोप करण्यात आले आहेत.

◼️अखेर सचिन माने याला अटक

या प्रकरणात सचिन माने याला सोमवारी रात्री ८.४५ वाजण्याच्या सुमारास अधिकृतरीत्या अटक करण्यात आली. त्यानंतर त्यांना न्यायालयात हजर करण्यात आले. स्मिता यांच्या मृत्यूमागील परिस्थिती, पती-पत्नीमधील वाद आणि फिर्यादीत करण्यात आलेल्या आरोपांची सत्यता तपासण्यासाठी पोलिसांनी सात दिवसांच्या पोलीस कोठडीची मागणी केली होती. न्यायालयाने सचिन माने यांना गुरुवारपर्यंत पोलीस कोठडी सुनावली.

◼️पती-पत्नीमध्ये वाद कधीपासून? मारहाणीचीही होणार पडताळणी

पती-पत्नीमध्ये भांडणे नेमकी कधीपासून होत होती, त्यांच्यातील वादाचे स्वरूप काय होते आणि मारहाणीचे प्रकार घडले होते का, याची चौकशी पोलिसांकडून केली जाणार आहे. स्मिता यांना अन्य कोणत्या अवजाराने किंवा हत्याराने मारहाण झाली होती का, यासह विविध शक्यतांच्या अनुषंगाने तपास करण्यात येत आहे. या प्रकरणात त्यांच्या मुलाकडे देखील चौकशी करून त्याने सांगितलेल्या माहितीची पडताळणी करणेही महत्त्वाचे मानले जात आहे.

◼️मी खूप चुकलो, ये परत…’ व्हॉट्सअॅप स्टेटसमुळे चर्चा.

स्मिता यांचा मृतदेह आढळून आलेल्या दिवशी सचिन माने यांनी व्हॉट्सअॅप स्टेटसवर ‘मी खूप चुकलो, ये परत…बाबू आजारी आहे, तो वाट बघतोय,परत ये’ असा भावनिक मजकूर ठेवल्याची माहिती समोर आली होती. या कथित स्टेटसमुळे प्रकरणाची पुन्हा चर्चा सुरू झाली..

◼️स्मिता यांचा मोबाईल घरातच; घरातून बाहेर पडण्याचा घटनाक्रम तपासाच्या केंद्रस्थानी.

स्मिता यांचा मोबाईल घरातच असल्याची बाबही समोर आली आहे. त्या मुलाला शाळेत सोडण्यासाठी खरोखरच घराबाहेर पडल्या होत्या का, त्या शाळेत गेल्या असल्यास कोणत्या वाहनाने गेल्या होत्या, त्यांच्या शाळेत जाण्याबाबत सीसीटीव्ही फुटेज पोलिसांच्या हाती लागले आहे का आणि त्या घरातून बाहेर पडल्याचा नेमका घटनाक्रम काय होता, असे अनेक प्रश्न उपस्थित झाले आहेत. या सर्व बाबींची उपलब्ध पुराव्यांच्या आधारे पडताळणी केल्यानंतरच घटनाक्रम स्पष्ट होऊ शकणार आहे.

◼️विसेरा राखून ठेवला; शवविच्छेदनाचा सविस्तर अहवाल अद्याप अप्राप्त.

या प्रकरणाचे तपासी अधिकारी तथा कुडाळ पोलीस निरीक्षक विकास बडवे यांनी दिलेल्या माहितीनुसार, गुन्ह्याच्या अनुषंगाने आवश्यक पुरावे व वस्तू जप्त करण्यात आल्या आहेत. मृत महिलेचा विसेरा राखून ठेवण्यात आला असून, शवविच्छेदन अहवालातून अद्याप स्पष्ट निष्कर्ष प्राप्त झालेला नाही. इन कॅमेरा पद्धतीने शवविच्छेदन करण्यात आले असून, शवविच्छेदन अहवाल अद्याप प्राप्त झालेला नाही. अहवाल प्राप्त झाल्यानंतर त्यानुसार पुढील तपास करण्यात येणार असल्याचे पोलीस निरीक्षक विकास बडवे यांनी सांगितले.

◼️आत्महत्या की घातपात? तपासातून उलगडा होणार

स्मिता माने यांचा मृत्यू आत्महत्या आहे की त्यामागे अन्य काही कारण आहे, याबाबत अद्याप स्पष्ट निष्कर्ष समोर आलेला नाही. फिर्यादीतील आरोप, मुलाकडून मिळणारी माहिती, उपलब्ध पुरावे, विसेरा तपासणी आणि शवविच्छेदनासंदर्भातील अहवाल या सर्व बाबी तपासाच्या दृष्टीने महत्त्वाच्या ठरणार आहेत. या प्रकरणातील प्रत्येक दुव्याची पडताळणी करून वस्तुस्थिती समोर आणण्याचे आव्हान पोलिसांसमोर आहे.