🛑कामचुकार अधिकाऱ्यांना मेमो काढा; पाणीटंचाई आढावा बैठकीत आमदार निलेश राणे आक्रमक बोलले.

✒️लोकसंवाद /- कुडाळ.

कुडाळ पंचायत समितीच्या छत्रपती संभाजी राजे सभागृहामध्ये कुडाळ-मालवण मतदारसंघाचे आमदार निलेश राणे यांच्या अध्यक्षतेखाली पाणीटंचाई आढावा बैठक पार पडली. येणाऱ्या भीषण दुष्काळी परिस्थितीचा सामना करण्यासाठी कागदावर नियोजन न ठेवता प्रत्यक्ष अंमलबजावणी करा, अशा सक्त सूचना देत रेंगाळलेल्या आणि निष्काळजी कामांवरून आमदार निलेश राणे यांनी संबंधित अधिकाऱ्यांची चांगलीच कानउघाडणी केली.
या बैठकीला जिल्हा परिषद उपाध्यक्ष दादा साईल, पंचायत समिती सभापती मिलिंद नाईक, उपसभापती सिताराम तेली, प्रांत अधिकारी ऐश्वर्या काळुसे, तहसीलदार सचिन पाटील, जिल्हा परिषद सदस्य, पंचायत समिती सदस्य, ग्रामपंचायत सदस्य, सरपंच, उपसरपंच, तलाठी, ग्रामसेवक व इतर सर्व प्रशासकीय अधिकारी उपस्थित होते.

जलसंधारण विभागाच्या संथ आणि अनागोंदी कारभारावर आमदार निलेश राणे यांनी तीव्र नाराजी व्यक्त केली. ५ महिने काय केले? असा सवाल करत अहवाल सादर न करू शकलेल्या कामचुकार अधिकाऱ्यांना तात्काळ मेमो काढण्याचे आणि त्यांच्यावर कडक कारवाई करण्याचे आदेश प्रांत अधिकारी ऐश्वर्या काळुसे यांना दिले. “पालकमंत्र्यांनी ६ दिवसांपूर्वी बैठक घेऊनही अधिकारी ढिम्म असतील, तर विकास कसा होणार? असे अधिकारी लोकांकडून मार खातील,” अशा परखड शब्दांत त्यांनी अधिकाऱ्यांना सुनावले.
तहसीलदार सचिन पाटील यांनी तालुक्यातील ९ गावांमध्ये पाणीटंचाई भासू शकते असा अहवाल सादर केला. यावर आमदारांनी प्रत्यक्ष परिस्थितीची पाहणी करून आणखी १० गावांचा यादीत समावेश करण्याचे निर्देश दिले, जेणेकरून टंचाईच्या वेळी ग्रामस्थांचे हाल होणार नाहीत. तसेच, ऐनवेळी धावपळ होऊ नये म्हणून आतापासूनच जास्तीत जास्त टँकर बुक करून ठेवण्याच्या सूचना दिल्या.

जलसंधारण अधिकाऱ्यांनी दिलेल्या माहितीनुसार तालुक्यात २३० बंधारे असून त्यातील १६५ बंधारे वापरण्याजोगे आहेत. यातील काही बंधारे १९६५ सालापासूनचे आहेत, तर २०२०-२१ मधील बंधारे सुस्थितीत आहेत. उर्वरित ६५ बंधाऱ्यांच्या दुरुस्तीसाठी ७ कोटी रुपयांच्या निधीची गरज असल्याचे सांगण्यात आले. दुरुस्तीचे काम प्रलंबित राहिल्याबद्दल आमदारांनी तीव्र असंतोष व्यक्त केला.

◼️रुपेश कानडे यांच्या कामाची प्रशंसा; इतरांनी आदर्श घेण्याचे आवाहन

जिल्हा परिषद सदस्य रुपेश कानडे यांनी आपल्या मतदारसंघात ३० बंधारे बांधण्याचे उद्दिष्ट ठेवून २४ बंधारे बचत गटांकडून, ६ बंधारे ग्रामपंचायतीकडून आणि ४ बंधारे तलाठी यांच्या माध्यमातून नियोजित केले आहेत. तसेच ६ बंधारे श्रमदानातून पूर्ण केले आहेत. त्यांच्या या गतीमान कामाचे कौतुक करत आमदार राणे यांनी इतर लोकप्रतिनिधी व अधिकाऱ्यांनी यांच्याकडून प्रेरणा घ्यावी, असा सल्ला दिला.
पूर्वी विहीर बांधण्यासाठी संमती पत्रावर परवानगी मिळत असे, मात्र आता ‘बक्षीस पत्राची’ अट घालण्यात आल्याने नेरूरसह अनेक ठिकाणची प्रकरणे रखडली आहेत. दुष्काळी परिस्थिती लक्षात घेता अशा प्रस्तावांवर सकारात्मक विचार करून मंजुरी देण्याचा सल्ला तहसीलदारांना देण्यात आला.
गावातील मंदिरांच्या आवारातील देवतळी आणि विहिरी गाळमुक्त व स्वच्छ करून त्यांचा पाणीसाठा टंचाई काळात वापरण्यायोग्य करण्याच्या सूचना दीपक नारकर यांच्या सुचनेनुसार देण्यात आल्या.

रब्बी हंगामात धरणाचे पाणी वाया जाऊ नये म्हणून पाण्याचा राखीव स्तर (रिझर्व्ह लेव्हल) निश्चित करण्याची सूचना मांडण्यात आली. यावर लवकरच सिंचन सर्व्हे करून योग्य मार्ग काढला जाईल, असे आश्वासन आमदार राणे यांनी दिले.
बोरवेल किंवा विहीर मारल्यानंतर पाणी न लागल्यास ठेकेदारांचे बिल थांबवले जाते, यावर चर्चा झाली. निष्फळ कामांवर शासनाचा पैसा वाया जात असल्याने सक्षम अधिकाऱ्यांची नियुक्ती करण्याची मागणी आमदारांनी केली.

वालावल तलाव शुद्धीकरण व जांभवडे विहीर दुरुस्ती
वालावल तलाव: वालावलचे सरपंच राजा परब यांनी तलावातील गाळ आणि जलपर्णीमुळे पाणी दूषित व दुर्गंधीयुक्त झाल्याची समस्या मांडली. यावर १ कोटी ७० लाख रुपयांचा प्रस्ताव लवकरच मंजूर करू व ‘नाम फाउंडेशन’च्या सहकार्याने गाळ काढणे व पाणी शुद्धीकरणाचे काम प्राधान्याने केले जाईल, असे आमदारांनी स्पष्ट केले.

जांभवडे विहीर दुरुस्ती: सरपंच मढव यांच्या सूचनेनुसार गाळ उपशाऐवजी विहिरींची दुरुस्ती करून पाण्याची पातळी वाढवण्याची ग्रामस्थांची मागणी मान्य करून त्यानुसारच सुविधा पुरवण्याचे आदेश अधिकाऱ्यांना दिले.

◼️३ कोटी ७७ लाखांचा टंचाई आराखडा..

सिंधुदुर्ग जिल्हा सध्या ‘ट्रिगर वन’ मध्ये आला असून येणारा काळ गंभीर असल्याचे आमदारांनी सांगितले. जिल्ह्याचा टंचाई आराखडा पूर्वी ६० लाखांचा असायचा, मात्र यंदा ३ कोटी ७७ लाख रुपयांचे नियोजन करण्यात आले असून १८० वाड्यांचा यात समावेश करण्यात आला आहे. सर्व कर्मचाऱ्यांनी पुढील बैठकीत कोणतीही कारणे न देता पूर्ण तयारीनिशी व लोकहिताची कामे पूर्ण करून यावे, असा सक्त इशारा देऊन बैठकीची सांगता करण्यात आली.