🛑कै.बाबा वर्दम स्मृती कुडाळ आयोजित भव्य आंतरराज्य नाट्यस्पर्धा २०२७ चे आयोजन.

✒️लोकसंवाद /- समिल जळवी कुडाळ.

बाबा वर्दम थिएटर्स, कुडाळ (जि. सिंधुदुर्ग) या नोंदणीकृत हौशी नाट्यसंस्थेच्या वतीने ‘बाबा वर्दम स्मृती नाट्यमहोत्सव-२०२७ अंतर्गत कै. बाबा वर्दम स्मृती आंतरराज्य नाट्यस्पर्धा’ दि. ७ जानेवारी ते १३ जानेवारी २०२७ या कालावधीत आयोजित करण्यात आली आहे.

महोत्सवाचे हे २९वे वर्ष असून या महोत्सवाने महाराष्ट्रभर स्वतःचे असे विशेष स्थान निर्माण केले आहे. कुडाळचे सांस्कृतिक वैभव ठरलेल्या या महोत्सवाचे उत्तम व्यवस्थापन हे खास वैशिष्ट्य आहे. या महोत्सवाची संपूर्ण महाराष्ट्रात ख्याती झाली असून, प्रेक्षकांचा उदंड प्रतिसाद ही या महोत्सवाची आणखी एक जमेची बाजू आहे.गेल्या २९ वर्षात महाराष्ट्राबरोबरच कर्नाटक, मध्यप्रदेश, गोवा येथील नामवंत नाट्यसंघांनी या महोत्सवात आपली नाटके सादर केली आहेत.

भारतातील कोणत्याही राज्यातील नोंदणीकृत हौशी नाट्यसंस्थांना, मराठी गद्य नाटकांसाठी हा महोत्सव खुला असून या महोत्सवाच्या अंतिम फेरीत एकूण ७ संघांना प्रवेश देण्यात येणार आहे. या महोत्सवातील अंतिम फेरीत प्रवेश मिळालेल्या संघास सादरीकरणानंतर रु. २५,०००/- एवढी रक्कम निर्मिती सहाय्य म्हणून देण्यात येईल. शिवाय महोत्सवासाठी निवडलेल्या संघांची कुडाळमधील प्रयोगादिवशीची चहा, भोजन, निवास याची व्यवस्था आयोजकांतर्फे करण्यात येईल. याबरोबरच सहभागी संघास स्मृतीचिन्ह व प्रमाणपत्र देण्यात येईल. या स्पर्धेसाठी प्रवेश फी आकारली जात नाही.

इच्छूक संघांनी विहीत नमुन्यातील प्रवेश अर्ज आवश्यक त्या कागदपत्रांसह दि. १५ ऑक्टोबर २०२६ पर्यंत पाठविणे आवश्यक आहे. ह्या स्पर्धेत अंतिम फेरीत एकूण फक्त सातच निवडक संघांना प्रवेश दिला जाणार असून त्यासाठी आयोजक संस्थेचे निवड मंडळ सर्व इच्छुक संघांचे नाट्यप्रयोग अगर रंगीत तालिमी दि. १४ नोव्हेंबर २०२६ ते ३० नोव्हेंबर २०२६ या कालावधीत पाहून निवड करणार आहेत. तालिम स्वरुपात प्राथमिक फेरीसाठी निवड झालेल्या संघाना दि. २५ ऑक्टोबर २०२६ रोजी प्राथमिक फेरीची तारीख व वेळ कळविण्यात येईल. अंतिम फेरीत निवड झालेल्या संघाना दि. ०१ डिसेंबर २०२६ पर्यंत प्रवेशाबाबत कळविण्यात येईल.

◼️स्पर्धेसाठी असलेली पारितोषिके

◼️पहिले पारितोषिक रु. ५०,०००/-प्रमाणपत्र व फिरता चषक

◼️दुसरे पारितोषिक रू. ३०,०००/-प्रमाणपत्र व फिरता चषक

◼️तिसरे पारितोषिक रु. २०,०००/- प्रमाणपत्र व फिरता चषक

इच्छुक संघांनी स्पर्धेची नियमावली, माहितीपत्रक व प्रवेश अर्जासाठी नाट्यमहोत्सव आयोजन समिती, बाबा वर्दम थिएटर्स, द्वारा श्री. आनंद वैद्य, ‘निलेंदू’, अॅक्सीस बँकेच्या मागे, कुडाळ ४१६५२०, जि. सिंधुदुर्ग. मोबाईल क्र. ८२७५३९०९०९ यांचेशी संपर्क साधावा किंवा bvtkudal53@rediffmail.com या पत्त्यावर e-mail पाठवावा.