🛑पत्रकार दत्तप्रसाद पेडणेकर यांचा प्रामाणिकपणा;रस्त्यात सापडलेला मोबाईल मूळ मालकाला परत.

✒️लोकसंवाद /- मसुरे.

मसुरे बाजारपेठ येथील रस्त्यावर पडलेला मोबाईल दैनिक तरुण भारतचे मसुरे येथील पत्रकार दत्तप्रसाद पेडणेकर यांना सोमवारी सापडला. सदर मोबाईल हा मसुरे देऊळवाडा येथील वयोवृद्ध ग्रामस्थ मोहन परब यांचा असल्याचे समजल्यानंतर पेडणेकर यांनी त्यांचा शोध घेतला.बुधवारी सकाळी पत्रकार दत्तप्रसाद पेडणेकर यांनी प्रामाणिकपणे सदर मोबाईल त्याचे मूळ मालक मोहन परब यांच्याकडे सुपूर्द केला. सध्याच्या काळात प्रामाणिकपणा दुर्मीळ होत असताना पेडणेकर यांनी दाखविलेल्या या माणुसकीच्या कृतीचे मसुरे परिसरातून कौतुक होत आहे.

मोहन परब यांची आर्थिक परिस्थिती अत्यंत बेताची असल्याने मोबाईल हरवल्याने त्यांना मोठी चिंता लागून राहिली होती. मात्र, हरवलेला मोबाईल पुन्हा मिळाल्याने त्यांना मोठा आनंद झाला. मोबाईल हातात मिळताच त्यांच्या डोळ्यांत आनंदाश्रू तरळले. यावेळी वयोवृद्ध मोहन परब यांनी पत्रकार दत्तप्रसाद पेडणेकर यांचे मनःपूर्वक आभार मानत त्यांच्या प्रामाणिकपणाचे कौतुक केले. त्यांच्या या कृतीमुळे समाजात आजही माणुसकी आणि प्रामाणिकपणा जिवंत असल्याचे अधोरेखित झाले आहे.