🛑”योजना शेवटच्या घटकापर्यंत पोहोचवा;लाभार्थ्याने नाक्यावर भेटलो तरी कौतुक केला पाहिजे” – आमदार निलेश राणे.

✒️लोकसंवाद /- कुडाळ.

“मी आमदार आहे, पण मी इथे कायमचा राहण्यासाठी आलेलो नाही. तुम्ही अधिकारीसुद्धा इथे कायमचे राहण्यासाठी आलेले नाहीत! त्यामुळे सरकारचा पैसा आणि योजना शेवटच्या घटकापर्यंत पोहोचवण्याची जबाबदारी प्रशासनाची आहे,” अशा कडक शब्दांत आमदार निलेश राणे यांनी अधिकाऱ्यांना त्यांच्या कर्तव्याची जाणीव करून दिली.

कुडाळ येथील सिद्धिविनायक सभागृहात मुख्यमंत्री देवेंद्र फडणवीस यांच्या जन्मशताब्दीनिमित्त आणि माजी मुख्यमंत्री कै. अजित पवार यांच्या जयंतीचे औचित्य साधून ‘छत्रपती शिवाजी महाराजस्व अभियान’ अंतर्गत ‘समाधान शिबिर’ मोठ्या उत्साहात आयोजित करण्यात आले होते. या कार्यक्रमात विविध शासकीय योजनांचा लाभ नागरिकांना सुपूर्द करण्यात आला.

मान्यवरांची प्रमुख उपस्थिती
दीपप्रज्वलनाने सुरू झालेल्या या कार्यक्रमात मुख्यमंत्री देवेंद्र फडणवीस यांची शुभेच्छा रूपी चित्रफित दाखवण्यात आली. याप्रसंगी व्यासपीठावर आमदार निलेश राणे, जिल्हाप्रमुख दत्ता सामंत, उपमुख्य कार्यकारी अधिकारी रवींद्र खेबूडकर, प्रांताधिकारी ऐश्वर्या काळुसे, जि.प. उपाध्यक्ष दादा साईल, शिवसेना उपनेते संजय आंग्रे, सभापती मिलिंद नाईक, कुडाळ नगराध्यक्षा प्राजक्ता बादेकर-शिरवलकर, मालवण नगराध्यक्षा ममता वराडकर, तहसीलदार सचिन पाटील, मालवण तहसीलदार गणेश सावे, नायब तहसीलदार अमरसिंह जाधव, संजय गवस, जि.प. सदस्य नागेश आईर, सुप्रिया वालावलकर, दिप्ती पडते, आरती पाटील, सुमेधा पाताडे, काका कुडाळकर, गटविकास अधिकारी मनोज भोगटे, गटशिक्षणाधिकारी श्री. राऊत यांच्यासह विविध विभागांचे अधिकारी,लोकप्रतिनिधी आणि नागरिक मोठ्या संख्येने उपस्थित होते.

आमदार निलेश राणे यांचे परखड विचार व प्रशासकीय कौतुक
आमदार निलेश राणे आपल्या भाषणात म्हणाले की, अजूनही अनेक लाभार्थी असे आहेत ज्यांना सरकारी योजनांची माहितीसुद्धा नाही. शासन म्हणून आपण स्वतः त्यांच्या दारापर्यंत गेले पाहिजे. मी सभागृहात लोकांच्या हक्कासाठी भांडतो, त्यामुळे काही जणांना मी भांडखोर वाटू शकतो; पण मी जेव्हा सभागृहात उभा राहतो, तेव्हा मी पक्षाचा विचार न करता या मातीचा प्रतिनिधी म्हणून बोलतो.

सिंधुदुर्ग जिल्हा आकारीपड, कबुलायतदार, इको-सेन्सिटिव्ह आणि वनसंज्ञेत अडकला असून या समस्या मधून कोकणाला मार्ग काढून द्यावाच लागेल, असे त्यांनी स्पष्ट केले. तसेच, अधिकाऱ्यांचे काम केवळ स्टॉल उभारण्यापुरते मर्यादित राहता कामा नये, तर नागरिकांनी रस्त्यावर येऊन अधिकाऱ्यांच्या कामाचे कौतुक केले पाहिजे, असा दिवस मला पाहायचा आहे, असे सांगत त्यांनी कुडाळ महसूल प्रशासनाच्या कामाचे कौतुक केले.

प्रास्ताविकात त्यांनी प्रशासकीय उपक्रमांची माहिती देताना सांगितले की, कुंभार समाजाला ओळखपत्र आणि ७०० ब्रास विनाअट माती रॉयल्टीमुक्त देण्याचा शासनाने निर्णय घेतला आहे. ‘शाळा तिथे दाखले’ मोहिमेअंतर्गत एका महिन्यात तब्बल २० ते २२ हजार दाखल्यांचे वाटप करण्यात आले आहे. कुडाळसाठी ४ कोटी रुपयांचा निधी उपलब्ध झाला असून, शेतकऱ्यांसाठी पानंद रस्ते योजना राबवली जात आहे. या सर्व कामांमध्ये आमदार निलेश राणे यांचे मोलाचे सहकार्य लाभल्याचे त्यांनी नमूद केले.
मुख्य कार्यकारी अधिकारी रवींद्र खेबूडकर यांनी सांगितले की, सिंधुदुर्गात ‘एआय’ (AI) तंत्रज्ञानाच्या माध्यमातून ९३% प्रगती साध्य झाली असून कृषी व वन विभागासाठी विशेष अ‍ॅप तयार करण्यात आले आहेत. जि.प. उपाध्यक्ष दादा साईल यांनीही या उपक्रमाचे कौतुक करत जास्तीत जास्त नागरिकांनी योजनांचा लाभ घेण्याचे आवाहन केले.

योजनांचे वाटप व लाभार्थ्यांचा उत्स्फूर्त सहभाग
कार्यक्रमादरम्यान आ. निलेश राणे यांनी नगरपंचायत ते महसूल विभागाच्या विविध २० स्टॉल्सला भेट देऊन पाहणी केली.
पुरात वाहून जाऊन मृत झालेल्या गणेश पालव यांच्या नातेवाईक संजीवनी पालव यांना ४ लाख रुपयांच्या मदतीचे प्रमाणपत्र सुपूर्द करण्यात आले.
याशिवाय कातकरी समाज बांधवांना जात प्रमाणपत्रे, महिला शेतकऱ्यांना दाखले, कृषी योजनांचे साहित्य, केशरी शिधापत्रिका आणि ३ महिन्यांच्या धान्याचे प्रतिनिधिक स्वरूपात वाटप करण्यात आले.
नागरिकांच्या उत्स्फूर्त प्रतिसादामुळे हॉलबाहेरही विशेष स्क्रीन लावण्यात आली होती. या यशस्वी कार्यक्रमाचे आभार कुडाळचे तहसीलदार सचिन पाटील यांनी मानले.