🛑तुळस प्राथमिक आरोग्य केंद्रात मासिक जन आरोग्य समितीची बैठक संपन्न.;आरोग्य सेवा अधिक प्रभावी करण्यावर भर.

✒️लोकसंवाद /- वेंगुर्ला.

वेंगुर्ला तालुक्यातील तुळस येथील प्राथमिक आरोग्य केंद्र येथे मासिक जन आरोग्य समितीची बैठक सर्व सदस्यांच्या व अधिकाऱ्यांच्या प्रमुख उपस्थितीत अत्यंत उत्साहात संपन्न झाली. बैठकीस जन आरोग्य समितीच्या अध्यक्षा सौ. सुजाता पडवळ या अध्यक्ष म्हणून उपस्थित होत्या.

​प्राथमिक आरोग्य केंद्राच्या माध्यमातून परिसरातील नागरिकांना उत्तम, सक्षम आणि वेळेवर आरोग्य सुविधा उपलब्ध करून देणे, आरोग्य सेवांची गुणवत्ता अधिक वाढवणे तसेच शासनाच्या विविध आरोग्यविषयक योजनांची तळागाळातील लोकांपर्यंत प्रभावी अंमलबजावणी करणे, या विषयांवर बैठकीत सविस्तर व सकारात्मक चर्चा करण्यात आली.

​या महत्त्वपूर्ण बैठकीस उभादांडा मतदारसंघाचे जिल्हा परिषद सदस्य श्री. संजय दत्ताराम गावडे, तालुका आरोग्य अधिकारी डॉ. रविंद्र लहानु लिलके, आरोग्य सहाय्यक तथा रुग्ण कल्याण सदस्य श्री. दयानंद सोमा गवस, प्रभारी वैद्यकीय अधिकारी डॉ. मिलींद श्रीधर मोळके, प्रा. आ. केंद्राच्या आयुष वैद्यकीय अधिकारी डॉ. सानिया हारूण खान, वरिष्ठ स्टाफ नर्स श्रीम. शिल्पा विजय आंबेरकर, ग्रामपंचायत आरोग्य उपसमिती सभापती श्री. सचिन सुरेश नाईक, महिला व बालविकास विभागाच्या क्षेत्र पर्यवेक्षिका श्रीम. शर्मिष्ठा पांडुरंग सामंत, पाणीपुरवठा व स्वच्छता विभाग प्रतिनिधी श्री. द्रौपदी अर्जुन नाईक यांची प्रमुख उपस्थिती होती.

याशिवाय तालुकास्तरीय शिक्षण विभाग अधिकारी श्री. संतोष दत्ताराम गोसावी, सार्वजनिक बांधकाम विभाग अधिकारी श्री. प्रितम कैवल्य पवार, तुळस ग्रामपंचायतीच्या सरपंच श्रीम. रश्मी रामचंद्र परब, रोटरी क्लब सदस्य श्री. स्वप्निल वासुदेव झांटये, नोंदणीकृत स्वयंसेवी संस्थेचे आरोग्य प्रतिनिधी मा.श्री. सचिन वासुदेव परुळकर यांच्यासह आरोग्य विभागातील इतर अधिकारी व कर्मचारी मोठ्या संख्येने उपस्थित होते.बैठकीच्या शेवटी आरोग्य केंद्रातील सोयी-सुविधा अधिक बळकट करण्यासाठी सर्व संबंधित विभागांनी समन्वयाने काम करण्याचा संकल्प करण्यात आला.