🛑जलसमाधी आंदोलन, राजू शेट्टींसह 25पेक्षा जास्त जणांवर गुन्हे दाखल.

✒️लोकसंवाद /- देवगड.

सिंधुदुर्ग जिल्ह्यात लागू असलेल्या जमावबंदी आदेशाचे उल्लंघन करून मिठमुंबरी येथील समुद्रकिनारी जलसमाधी आंदोलन आयोजित केल्याप्रकरणी महाविकास आघाडीच्या विविध पक्षांच्या प्रमुख नेत्यांसह बागायतदार संघटनेच्या पदाधिकाऱ्यांवर देवगड पोलीस ठाण्यात गुन्हे दाखल करण्यात आले आहेत.

देवगड तालुक्यात प्रस्तावित अणुऊर्जा प्रकल्प रद्द करावा आणि आंबा बागायतदारांना वाढीव नुकसानभरपाई द्यावी, या मागण्यांसाठी हे आंदोलन करण्यात आले होते. मात्र, सरकारी आदेश झुगारून मोठ्या संख्येने जमाव एकत्र केल्याचा आरोप पोलिसांनी केला आहे. या प्रकरणी माजी खासदार विनायक राऊत, खासदार राजू शेट्टी, रासपचे अध्यक्ष महादेव जानकर, माजी आमदार वैभव नाईक, मनसे जिल्हाध्यक्ष धीरज परब, काँग्रेसच्या महिला जिल्हाध्यक्षा साक्षी वंजारे, युवा सेना जिल्हाप्रमुख सुशांत नाईक, संतोष राऊळ, किरण टेंबुलकर, उमेश कुलकर्णी, विलास साळस्कर, रवींद्र जोगल, चंदन मेस्त्री यांच्यासह आनंद ढोके, गणेश गावकर, गणेश वाळके, रामानंद वाळके, स्वप्निल तोडणकर, अजय नानेरकर, संजय आचरेकर, दिनेश धूवाळी, प्रसाद दुखंडे, शरद परब, धीरज घाडी, डॉ. मंगेश सावंत आणि राजेंद्र गड्याळवर यांच्यावर गुन्हे नोंदवण्यात आले आहेत.

देवगड पोलीस ठाण्यातील पोलीस कर्मचारी रवींद्र महाले यांनी दिलेल्या फिर्यादीवरून ही कारवाई करण्यात आली असून, संबंधितांवर महाराष्ट्र पोलीस अधिनियम आणि भारतीय न्याय संहितेच्या विविध कलमांन्वये गुन्हे दाखल करण्यात आले आहेत. या प्रकरणाचा पुढील तपास देवगड पोलीस करत आहेत.