🛑माजी आमदार परशुराम उपरकर यांच्या वाढदिवसानिमित्त आश्रमांना जीवनावश्यक वस्तूंचे वाटप.

✒️लोकसंवाद /- ​कुडाळ.

शिवसेना उद्धव बाळासाहेब ठाकरे पक्षाचे नेते आणि माजी आमदार परशुराम उर्फ जीजी उपरकर यांच्या वाढदिवसाचे औचित्य साधून सामाजिक बांधिलकी जपत पणदूर आणि अणाव येथील आश्रमांमध्ये जीवनावश्यक साहित्याचे वाटप करण्यात आले.

​जीजी उपरकर यांचा वाढदिवस दरवर्षी त्यांच्या समर्थकांकडून आणि कार्यकर्त्यांकडून मोठ्या उत्साहात साजरा केला जातो. यंदा मात्र कोणताही डामडौल न करता, गरजूंच्या मदतीसाठी हा दिवस समर्पित करण्यात आला. या उपक्रमांतर्गत पणदूर आणि अणाव येथील आश्रमातील निवासियांना दैनंदिन जीवनात लागणाऱ्या विविध वस्तूंचे वाटप करण्यात आले.
​या सामाजिक उपक्रमावेळी शिवसेना (उबाठा) पक्षाचे पदाधिकारी आणि कार्यकर्ते मोठ्या संख्येने उपस्थित होते. यामध्ये प्रामुख्याने राजेश टंगसाळी, नारायण उर्फ आप्पा मांजरेकर, सुनील यशवंत कुलकर्णी, धाकू विश्राम जाधव, समीर आंगणे, नितीन जाधव, शशिकांत जंगम, रितेश साळगावकर व इतर मान्यवरांचा समावेश होता.
​परशुराम उपरकर यांनी आपल्या राजकीय कारकिर्दीत नेहमीच जनसामान्यांचे प्रश्न लावून धरले आहेत. त्यांच्या वाढदिवसानिमित्त करण्यात आलेल्या या सेवाभावी कार्याचे सर्व स्तरातून कौतुक होत आहे. ‘वाढदिवसाचा खर्च टाळून तो निधी समाजोपयोगी कामासाठी वापरल्याने आश्रमातील व्यक्तींच्या चेहऱ्यावर समाधान पाहायला मिळाले,’ अशी भावना यावेळी उपस्थित कार्यकर्त्यांनी व्यक्त केली.