🛑देवी अंगात येते” म्हणत लोकांची फसवणूक करणाऱ्या महिलेचा अंधश्रद्धा निर्मूलन समितीकडून भांडाफोड.

✒️लोकसंवाद /- मालवण.

“देवी अंगात येते” असा बनाव करून लोकांची फसवणूक करणाऱ्या एका महिलेचा प्रकार अखेर उघडकीस आला आहे. पोटापाण्यासाठी आणि मुलांच्या शिक्षणासाठी आपण दुर्गामाता, लक्ष्मी माता, चंडिका माता, फटकीदेवी, रेणुका माता आदी विविध देवी अंगात येत असल्याचे सोंग करत असल्याची कबुली देत संबंधित महिलेने अखिल भारतीय अंधश्रद्धा निर्मूलन समितीसमोर लेखी माफीनामा दिला.

मालवण शहरातील एका वाडीत राहणारी ही महिला आठवड्यातील वेगवेगळ्या दिवशी वेगवेगळ्या देवी अंगात येतात असे सांगत लोकांना भूत-भविष्य-वर्तमान सांगत असे. लोकांच्या समस्या सोडवण्याचे आश्वासन देत ती त्यांच्याकडून पैसेही घेत असल्याचे उघड झाले आहे. याचबरोबर तिने स्वतःच्या भावजयीवर “करणी” केल्याचा आरोप करून तिची वाडीत बदनामी केल्याचेही समोर आले.

या त्रासाला कंटाळून तिच्या भावजयीने अखिल भारतीय अंधश्रद्धा निर्मूलन समितीचे जिल्हा संघटक विजय चौकेकर यांच्याकडे लेखी तक्रार दिली. त्यानंतर चौकेकर यांनी महिला संघटिका उज्वला येळावीकर, जिल्हा सरचिटणीस अजित कानशिडे आणि युवा संघटक युगांत चव्हाण यांच्या सोबत त्या महिलेची भेट घेतली.

समितीच्या सदस्यांनी स्वतःची खरी ओळख न सांगता तिची “दैवी शक्ती” तपासण्यासाठी काही प्रश्न विचारले. चौकेकर यांनी आपल्या मुलाच्या अपघाती मृत्यूनंतर सुनेला मूल होत नसल्याचे सांगितले, तर उज्वला येळावीकर यांनी मुलीच्या लग्नातील दागिने चोरीस गेल्याचे सांगितले. युगांत चव्हाण यांनी आई-वडिलांशी भांडणाऱ्या मुलाबाबत प्रश्न उपस्थित केला.

त्यावर त्या महिलेने सुनेवर “करणी” असल्याचे सांगत ती काढल्याशिवाय मूल होणार नाही, चोरी गेलेले दागिने नवऱ्या-मुलानेच चोरले असून पंधरा दिवसांत परत मिळतील, तसेच युगांत चव्हाण यांना दोन भुते झपाटली असल्याचे सांगत अघोरी उपाय सुचवले.

पुढील भेटीत “भूत काढण्याच्या” नावाखाली तिने युगांत चव्हाण यांच्या पायाच्या अंगठ्यावर जोराने दाब देत इजा करण्याचा प्रयत्न केला, तर सुनेच्या केसांना धरून तिला गोल-गोल फिरवत “संमंध बाधा उतरवण्याचा” बनाव केला.यानंतर तिसऱ्या भेटीत समितीच्या सदस्यांनी आपली खरी ओळख उघड करत तिच्या सर्व दाव्यांचा पर्दाफाश केला. चौकेकर यांचा मुलगा चार वर्षांपूर्वीच अपघातात मृत्यूमुखी पडल्याचे, येळावीकर यांच्या घरी कोणतीही चोरी झाली नसल्याचे आणि युगांत चव्हाण हे चार्टर्ड अकाउंटंट असून त्यांना कोणताही त्रास नसल्याचे स्पष्ट केले. तसेच जादूटोणा विरोधी कायद्यानुसार अशा प्रकारांना शिक्षा होऊ शकते, याची माहिती दिली.

ही बाब समजताच त्या महिलेला आपल्या कृत्यांची जाणीव झाली. “माझ्या अंगात कोणतीही देवी येत नाही, कोणतीही अलौकिक शक्ती नाही. पोटापाण्यासाठी आणि मुलांच्या शिक्षणासाठी मी हे सोंग करत होते,” अशी कबुली देत तिने समितीकडे लेखी माफीनामा सादर केला आणि पुढे असे कृत्य करणार नाही, असेही लेखी दिले.
तिची लहान मुले आणि आजारी पती यांचा विचार करून समितीने तिच्याविरोधात पोलिसात तक्रार दाखल न करता तिला समज देऊन सोडले. मात्र भविष्यात पुन्हा अशी तक्रार आल्यास कायदेशीर कारवाई केली जाईल, असा इशाराही देण्यात आला.

दरम्यान,जर कोणत्याही व्यक्तीच्या अंगात खरोखरच दैवी शक्ती असल्याचा दावा असेल आणि त्यांनी समितीच्या प्रश्नांची अचूक उत्तरे दिली तर ८० लाख रुपयांचे बक्षीस देण्याचे आव्हानही जिल्हा संघटक विजय चौकेकर यांनी केले.या भांडाफोड मोहिमेस अध्यक्ष ॲड. राजीव बिले यांचे मार्गदर्शन लाभले.