🛑आंबा उत्पादक शेतक-यांच्या पाठीशी राहणार – मंत्री नितेश राणे.

◼️शेतकऱ्यांच्या प्रश्नांत राजकारण नको,शेतकऱ्यांचे हित पहा;कायमस्वरूपी तोडग्यासाठी ‘एआय’ तंत्रज्ञानाची मदत घेणार.

✒️लोकसंवाद /- कणकवली.

लोकशाहीत प्रत्येकाला “आंदोलन किंवा मोर्चा काढणे हा ज्याचा त्याचा अधिकार आहे, पण सध्या आपल्या जिल्ह्यावर संकट आहे. खरोखरच आंबा बागायतदार शेतक-यांचे कालखंडातील मोठे नुकसान झालेले आहे. आंबा बागायतदार शेक-यांचे 80 ते 85 टक्के नुकसान झाल्याबाबत प्रशासनाने पंचनामे करत सरकारकडे अहवाल सादर केला आहे. सरकारचा प्रतिनीधी म्हणून या सर्व विषयात मी माझ्या शेतक-यांसोबत आहे. हा प्रश्न मला मिटवायचा आहे. मात्र, राजू शेट्टींना त्यांच्या भागात काम कमी झाले आहे. कुणीही इथले वातावरण खराब करण्याचा प्रयत्न करु नये. आखाती देशांतील बाजारपेठेवरही याचा परिणाम होऊ शकतो. त्यामुळे हे प्रकरण ‘सिंधुदुर्ग’ म्हणून गांभीर्याने हाताळावे लागेल. शासन म्हणून आम्ही मदत मिळवून देण्यासाठी पूर्ण ताकद लावणार असल्याची माहिती पालकमंत्री नितेश राणे यांनी पत्रकार परिषदेत दिली.

आंबा उत्पादक शेतकरी सध्या निसर्ग आणि हवामान बदलामुळे मोठ्या संकटात सापडला आहे. बागायतदारांचे जवळपास ८५ टक्के नुकसान झाले असून, यावर कायमस्वरूपी तोडगा काढण्यासाठी सरकार कटिबद्ध आहे. बारामती येथील ‘एडीटी’ (ADT) संस्थेच्या माध्यमातून आधुनिक कृत्रिम बुद्धिमत्ता (AI) आणि ड्रोन प्रणालीचा वापर करून आंबा शेतीचे व्यवस्थापन केले जाईल. जिल्ह्यातील ३४ हजार २९६ हेक्टर आंबा क्षेत्राला हवामान बदल, कीड आणि अनिश्चित फुलोरा या समस्यांचा विळखा बसला आहे. यावर मात करण्यासाठी प्रत्येक झाडाचे निरीक्षण करणारी आणि दर ५०० मीटरवर अचूक हवामान देणारी प्रणाली विकसित केली जाणार आहे. यासाठी प्रति हेक्टर ४५ हजार रुपये खर्च अपेक्षित असून, साडेचार कोटींचा निधी जिल्हा नियोजन समितीमार्फत दिला जाईल. संबंधित कंपनीला 10 दिवसांत अहवाल देण्याची सुचना दिली आहे, असे मंत्री नितेश राणे यांनी सांगितले.

आतापर्यतच्या इतिहासात आंबा उत्पादक शेतक-यांनी कधीही मदतीसाठी हात पसरला नव्हता, पण आज परिस्थिती गंभीर आहे. महायुती सरकार बागायतदारांच्या पाठीशी ठामपणे उभे आहे. प्रशासनाने पंचनामे करुन अहवाल तयार केलेला आहे. परंतु, पंचनामे झाले नसतील तर त्या क्षेत्राची माहिती तत्काळ द्यावी. त्या शेतक-यांचे पंचनामे केले जातील. राजकारण किंवा आंदोलनापेक्षा संवादातून मार्ग काढूया. माझे दरवाजे शेतकऱ्यांसाठी नेहमी उघडे आहेत. विनाकारण वातावरण खराब करु नका , शेवटी आपल्या सर्वांना एकत्र येवून मार्ग काढायचा आहे. चर्चेसाठी मी तयार आहे, मी आंबा बागायदारांच्या प्रतिनीधींसमवेत बैठका घेतल्या. त्या बैठकीत शेतक-यांसमवेत बैठक घेण्याची ठरली होती, त्यानुसार मी रविवारी सकाळी शेतक-यांना भेटणार आहे.

◼️तंत्रज्ञानाची ‘कवचकुंडले’
आंब्याच्या बागा वाचवण्यासाठी आता आधुनिक तंत्रज्ञानाचा आधार घेतला जाणार आहे.
एआय आणि ड्रोन: प्रत्येक झाडाची प्रकृती आणि कीडरोगावर लक्ष ठेवणार आहे. अचूक हवामान: दर ५०० मीटरवर हवामानाचा अंदाज देणारी यंत्रणा कार्यान्वित होईल. शेतक-यांना डिजिटल व्यवस्थापन लागवडीपासून काढणीपर्यंतच्या प्रत्येक टप्प्यावर डिजिटल मार्गदर्शन केले जाणार आहे. आता झालेले नुकसान लक्षात घेता पुढील काळात कायमस्वरुपी तोडगा काढण्यासाठी सरकारचे प्रयत्न असल्याचे मंत्री नितेश राणे यांनी सांगितले.

◼️संशोधन केंद्रांचे काम ढिसाळ –

दापोली कृषी विद्यापीठ , वेंगुर्ले कृषी संशोधन केंद्र , मुळदे संशोधन केंद्र याठिकाणी शासनाचे पगार घेवून माणसे काम करत आहेत. परंतु, हे शेक-यांपर्यंत पोहोचत नाहीत , शेतक-यांना योग्य माहिती देत नाहीत, शेतकऱ्यांना मार्गदर्शन मिळत नाही, हा ढिसाळ कारभार खपवून घेतला जाणार नाही, असा इशारा पालकमंत्री नितेश राणे यांनी देत संबंधितांवर कठोर कारवाईचा इशारा दिला आहे.