🛑शिरोडा–वेळागर येथे श्री देव लिंगेश्वर मंदिराचा 23वा वर्धापन दिन सोहळा.;धार्मिक-सांस्कृतिक कार्यक्रमांची पर्वणी.

✍️लोकसंवाद /- वेंगुर्ला.

शिरोडा–वेळागर येथील भाविकांचे श्रद्धास्थान असलेल्या श्री देव लिंगेश्वर देवस्थान मंदिराचा २३ वा वर्धापन दिन रविवार, दिनांक ८ फेब्रुवारी २०२६ रोजी भक्तिमय आणि सांस्कृतिक वातावरणात साजरा होणार आहे. या निमित्ताने दिवसभर विविध धार्मिक विधी, भक्तीपर कार्यक्रम तसेच सांस्कृतिक आयोजन करण्यात आले असून, परिसरात मोठ्या उत्साहाचे वातावरण निर्माण झाले आहे.

शिरोडा–वेळागर येथील प्रसिद्ध श्री देव लिंगेश्वर मंदिराच्या वर्धापन दिनानिमित्त सकाळी ८.०० वाजता धार्मिक विधींनी कार्यक्रमाची सुरुवात होणार आहे. सकाळी ९.०० वाजता वरद शंकर महापूजा, दुपारी १२.०० वाजता आरती व तीर्थप्रसाद, तर दुपारी १२.३० ते ३.०० या वेळेत भाविकांसाठी महाप्रसादाचे आयोजन करण्यात आले आहे.

सायंकाळी ६.०० ते ७.०० या वेळेत भाविकांची भजने होणार असून, रात्री ७.०० ते ८.०० या वेळेत “श्री”ची पालखी भक्तिभावात काढली जाणार आहे. रात्री ८.०० ते ९.०० या वेळेत विद्यार्थी गुणगौरव, विशेष प्राविण्य मिळवलेल्या व्यक्तींचा सत्कार तसेच बक्षीस वितरण समारंभ आयोजित करण्यात आला आहे.

रात्री १०.०० वाजता खानोलकर दशावतार नाट्य मंडळ, खानोली यांचा भव्य दशावतारी नाट्यप्रयोग सादर होणार असून, या नाट्यप्रयोगाला रसिकांचा मोठा प्रतिसाद अपेक्षित आहे.
या पवित्र वर्धापन दिनानिमित्त आयोजित सर्व कार्यक्रमांना भाविक भक्तांनी मोठ्या संख्येने उपस्थित राहावे, असे आवाहन श्री देव लिंगेश्वर मंदिर समिती, सल्लागार मंडळ तसेच शिरोडा–वेळागर ग्रामस्थांच्या वतीने करण्यात आले आहे.