🛑गिअर अप जिमतर्फे रांगणा गड ट्रेक चे आयोजन.

🖋️लोकसंवाद /- कुडाळ.

गड,किल्ल्यांचे जतन व संवर्धन होण्यासाठी दरवर्षी गिअर अप जिमतर्फे *रांगणा गड ट्रेक* चे आयोजन करण्यात येते.यामध्ये अनेक गडप्रेमी सहभागी होतात. सुरक्षित,शिस्तबद्ध व सुंदर नियोजन हे ट्रेकचे वैशिष्ट्य. यामुळे दरवर्षी ट्रेकला येणाऱ्यांची संख्या जास्त असते.

यावर्षी रविवार दि.11 जानेवारी 2026 या दिवशी जिमचे मालक श्री.साईराज जाधव यांच्या नेतृत्वाखाली रांगणा गड ट्रेकचे आयोजन करण्यात आले होते.या ट्रेकसाठी जिममधील व जिम व्यतिरिक्त असे 80 गडप्रेमी या मोहिमेत सहभागी झाले होते.

या ट्रेकची सुरुवात जिमचे जेष्ठ सदस्य सन्मा.डॉक्टर सुरज शुक्ला,डॉक्टर सुविधा वाळवे, डॉक्टर पूजा गावडे यांच्या हस्ते महाराष्ट्राचे आराध्य दैवत व स्वराज्याचे संस्थापक छत्रपती शिवाजी महाराज यांच्या पुतळ्याला पुष्पहार अर्पण करून करण्यात आली.

त्यानंतर या ट्रेकसाठी योगदान देणाऱ्या व ट्रेकमध्ये सहभागी झालेल्या जेष्ठ व्यक्तींचा स्वागत तथा सत्कार करण्यात आला.त्यामध्ये जेष्ठ सदस्या श्रीम.मनीषा पोरे, श्रीम. कविता शेळके, श्रीम. दिव्या गावडे यांचे स्वागत करण्यात आले तसेच न्यू लाईफ फिजिओथेरपी सेंटरचे डॉक्टर श्री. सुरज शुक्ला हे स्वतः या ट्रेकमध्येआपल्या टीमसहीत निशुल्क सेवा देण्यासाठी सहभागी झाले याबद्दल त्यांचा व त्यांच्या टीमचा सत्कार करण्यात आला.गेले सात वर्षे या ट्रेकच्या निमित्ताने जेवण व नाश्ताची सोय करणारे व ट्रेक यशस्वी करण्यासाठी सर्वोतोपरी मदत करणारे श्री. अमित सरनोबत व श्री.एकनाथ सरनोबत यांचा सत्कार करण्यात आला.सर्वांचे लक्ष वेधून घेणारा या ट्रेकमध्ये सहभागी झालेला सर्वात छोटा 3 वर्षाचा पद्मनाब पाटकर याचे गुलाबपुष्प देऊन श्री. साईराज जाधव यांच्या हस्ते सत्कार करण्यात आला.

स्वागत – सत्काराच्या कार्यक्रमानंतर प्रत्यक्ष ट्रेकला सकाळी 8.20 ला सुरुवात झाली आणि मजल दरमजल करत,एकमेकांना मदतीचा हात देत, एकमेकांनी आणलेल्या खाऊचा आस्वाद घेत गिअर अप टीम 10 वाजता गडावर पोहोचली.गडाच्या मुख्य दरवाजाजवळ जिमच्या जेष्ठ सदस्या श्रीम.कविता शेळके यांच्या हस्ते श्रीफळ वाढवून शिवाजी महाराजांचा जयघोष करून 80 गड प्रेमीची टीम गाईड सन्मा. किशोर सरनोबत यांच्या सोबत गडाची इत्यंभूत माहिती घेण्यासाठी निघाली.किशोर सरनोबत यांनी आपल्या ओघवत्या भाषेत अतिशय सुंदर गडाची माहिती सांगितली. गडाची त्यांना खडानखडा माहिती असल्याची जाणीव त्यांच्या बोलण्यातून होत होती.त्यांची वक्तृत्व शैली वाखाणण्याजोगी होती. त्यांनी शिवाजी महाराजांवर सादर केलेली कविता सर्वांना भावली. त्याशिवाय जिमचा सदस्य श्री. ज्ञानेश्वर आळवे यांनी स्व-संरक्षणासाठी लाठी-काठीचे प्रात्यक्षिक सादर करून सगळ्यांची मने जिंकली.

गडाची पाहणी करून झाल्यानंतर दुपारी 12.30 वाजता गड उतारायला सुरुवात झाली. 2 वाजता संपूर्ण टीम सरनोबत यांच्या निवास स्थानी आली. श्री.अमित सरनोबत व श्री. एकनाथ सरनोबत यांनी केलेल्या मिष्टान्न जेवणाचा सर्वांनी मनसोक्त आस्वाद घेतला. जेवणानंतर सर्व सहभागी गडप्रेमींना जिमचे मालक श्री. हेमंत जाधव व श्री. साईराज जाधव यांच्या हस्ते प्रमाणपत्राचे वितरण करण्यात आले.यावेळी ट्रेकमध्ये सहभागी झालेल्या सर्वांनी उत्तम नियोजनाबद्दल श्री. साईराज जाधव व त्यांच्या संपूर्ण टीमचे कौतुक केले. ट्रेक यशस्वी करण्यासाठी जिमचे ट्रेनर पंकज गावडे,दर्शन मयेकर, मनीष घाडी तसेच न्यू लाईफ फिजिओथेरपी सेंटरचे डॉक्टर श्री.सुरज शुक्ला, जिमचे सदस्य विशाल कदम, ऋषिकेश महाजन,ज्ञानेश्वर आळवे, अदनान करोल, रुद्रराज कुडाळकर यांचे सहकार्य लाभले.