🛑पारपोली येथील फुलपाखरू महोत्सव व ट्री हाऊसचे पालकमंत्री नितेश राणे,आमदार दीपक केसरकार यांच्या हस्ते उद्घाटन.

🖋️लोकसंवाद /- सावंतवाडी.

सावंतवाडी तालुक्यातील पारपोली येथे आयोजित करण्यात आलेल्या फुलपाखरू महोत्सवाच्या माध्यमातून या ठिकाणी ग्रामीण भागाचा पर्यटन दृष्ट्या विकास होणार आहे. या ठिकाणी पर्यटक यावेत यासाठी राबविण्यात येत असलेले प्रयत्न कौतुकास्पद आहेत. यासाठी आवश्यक असलेल्या सर्व सहकार्य मी नक्कीच करेन,असे पालकमंत्री नितेश राणे त्यांनी सांगितले.

निसर्गसंपन्न पारपोली गावाच्या वैभवात भर टाकणाऱ्या वन विभागाच्या ‘ट्री-हाऊस’, स्वागत कमान आणि ‘पारपोली फुलपाखरू महोत्सवा’चा दिमाखदार उद्घाटन सोहळा जिल्ह्याचे पालकमंत्री नितेश राणे यांच्या हस्ते व माजी शालेय शिक्षण मंत्री तथा स्थानिक आमदार दीपक केसरकर यांच्या प्रमुख उपस्थितीत संपन्न झाला.यावेळी उपवनसंरक्षक मिलीश शर्मा, सरपंच कृष्णा नाईक, जिल्हा बँक संचालक महेश सारंग माजी नगरसेवक उदय नाईक, माजी पंचायत समिती सदस्य संदीप गावडे, सहाय्यक वनसंरक्षक सुनील लाड, वैभव बोराटे,उपसरपंच संदेश गुरव, वनक्षेत्रपाल प्रमिला शिंदे,चौकुळ सरपंच गुलाबराव गावडे यांच्यासह वन विभागाचे अधिकारी व ग्रामस्थ मोठ्या संख्येने उपस्थित होते. यांच्यासह वन विभागाचे वरिष्ठ अधिकारी आणि ग्रामस्थ मोठ्या संख्येने उपस्थित होते.

यावेळी श्री. राणे यांनी जिल्ह्याच्या सर्वांगीण विकासाचा संकल्प बोलून दाखवला. जिल्ह्याच्या विकासासाठी सिंधुरत्न योजनेतून अनेक महत्त्वपूर्ण प्रकल्प साकारले गेले असून, निधीअभावी रखडलेल्या प्रकल्पांना पुन्हा गती देऊन आवश्यक तो निधी उपलब्ध करून देण्याची जबाबदारी आपली असल्याचे त्यांनी नमूद केले. पर्यटनाच्या माध्यमातून जिल्ह्याचे अर्थकारण बदलण्यावर भर देताना ते म्हणाले की, मोपा विमानतळामुळे पर्यटकांची मोठी संख्या या भागाकडे वळत आहे. जेव्हा पर्यटक तीन दिवस सिंधुदुर्गात आणि एक दिवस गोव्यात घालवेल, तेव्हाच खऱ्या अर्थाने जिल्ह्याची प्रगती होईल. या महोत्सवाच्या व्यापक प्रचारासाठी मोपा विमानतळापासून पारपोलीपर्यंत मोठे होर्डिंग्ज लावण्याच्या सूचनाही त्यांनी वन विभागाला दिल्या.