🛑राज्यातील 29महापालिकांचा निवडणूक कार्यक्रम जाहीर.;15 जानेवारी मतदान आणि 16 जानेवारी मतमोजणी.

🖋️लोकसंवाद /- मुंबई.

महाराष्ट्र ज्यातील महापालिका निवडणुका नेमक्या कधी होणार,याकडे संपूर्ण महाराष्ट्राचं लक्ष लागलं असतानाच निवडणूक आयोगाने यासंदर्भात अत्यंत महत्त्वाची घोषणा केली आहे. निवडणूक आयोगाच्या पत्रकार परिषदेत राज्यातील महापालिका निवडणुकीच्या संपूर्ण कार्यक्रमाची अधिकृत घोषणा करण्यात आली.

या घोषणेनुसार, येत्या १५ जानेवारी २०२६ रोजी महापालिका निवडणुकांसाठी मतदान होणार असून, १६ जानेवारी २०२६ रोजी मतमोजणी केली जाणार आहे. या निवडणुकीमुळे राज्यातील स्थानिक स्वराज्य संस्थांच्या राजकारणाला पुन्हा एकदा वेग येणार आहे.

राज्यातील महापालिका निवडणुका नेमक्या कधी होणार, याकडे संपूर्ण महाराष्ट्राचं लक्ष लागलं असतानाच आज निवडणूक आयोगाने यासंदर्भात अत्यंत महत्त्वाची घोषणा केली आहे. निवडणूक आयोगाच्या पत्रकार परिषदेत राज्यातील महापालिका निवडणुकीच्या संपूर्ण कार्यक्रमाची अधिकृत घोषणा करण्यात आली. या घोषणेनुसार, येत्या १५ जानेवारी २०२६ रोजी महापालिका निवडणुकांसाठी मतदान होणार असून, १६ जानेवारी २०२६ रोजी मतमोजणी केली जाणार आहे. या निवडणुकीमुळे राज्यातील स्थानिक स्वराज्य संस्थांच्या राजकारणाला पुन्हा एकदा वेग येणार आहे.

निवडणूक आयोगाने दिलेल्या माहितीनुसार, राज्यातील एकूण २९ महापालिकांसाठी ही निवडणूक होणार असून २८६९ जागांसाठी मतदान घेतले जाणार आहे. या सर्व महापालिका क्षेत्रांमध्ये आजपासून आचारसंहिता लागू करण्यात आल्याची घोषणा निवडणूक आयोगाच्या वतीने करण्यात आली आहे. त्यामुळे आता या भागांमध्ये कोणतेही विकासकाम, उद्घाटन किंवा राजकीय घोषणा करता येणार नाहीत.

निवडणूक कार्यक्रमानुसार, २३ डिसेंबर ते ३० डिसेंबर या कालावधीत उमेदवारांना आपले उमेदवारी अर्ज दाखल करता येणार आहेत. त्यानंतर ३१ डिसेंबर रोजी अर्जांची छाननी केली जाणार आहे. इच्छुक उमेदवारांना २ जानेवारी २०२६ पर्यंत अर्ज मागे घेण्याची संधी असणार असून, ३ जानेवारी २०२६ रोजी निवडणूक चिन्हांचे वाटप करण्यात येणार आहे. त्यानंतर प्रत्यक्ष १५ जानेवारी २०२६ रोजी मतदान आणि १६ जानेवारी रोजी मतमोजणी होणार आहे.

या महापालिका निवडणुकीत आरक्षणाची रचना देखील निवडणूक आयोगाने स्पष्ट केली आहे. एकूण २८६९ जागांपैकी १४४२ जागा महिलांसाठी राखीव ठेवण्यात आल्या आहेत. तर अनुसूचित जातींसाठी ३४१ जागा, अनुसूचित जमातींसाठी ७७ जागा, आणि ओबीसी प्रवर्गासाठी ७५९ जागा राखीव असणार आहेत. त्यामुळे यंदाच्या महापालिका निवडणुकीत महिलांचा आणि आरक्षित घटकांचा सहभाग मोठ्या प्रमाणात पाहायला मिळणार आहे.

निवडणूक होणाऱ्या महापालिकांमध्ये राज्यातील जवळपास सर्व प्रमुख शहरे समाविष्ट आहेत. यात मुंबई, ठाणे, नवी मुंबई, उल्हासनगर, कल्याण-डोंबिवली, भिवंडी-निजामपूर, मिरा-भाईंदर, वसई-विरार, पनवेल, नाशिक, अहिल्यानगर, जळगाव, धुळे, मालेगाव, पुणे, पिंपरी-चिंचवड, सोलापूर, कोल्हापूर, इचलकरंजी, सांगली-मिरज-कुपवाडा, छत्रपती संभाजीनगर, नांदेड-वाघाळा, परभणी, जालना, लातूर, अमरावती, अकोला, नागपूर आणि चंद्रपूर या महापालिकांचा समावेश आहे.

दरम्यान, यंदाच्या महापालिका निवडणुकीसाठी उमेदवारी अर्ज केवळ ऑफलाईन पद्धतीनेच भरावे लागणार असल्याचं निवडणूक आयोगाने स्पष्ट केलं आहे.त्याचबरोबर ज्यांच्या नावावर दुबार मतदान नोंदलेलं आहे, अशा मतदारांच्या नावासमोर स्टार मार्क करण्यात आला असून, अशा नागरिकांना फक्त एका मतदान केंद्रावरच मतदान करता येणार आहे, असंही आयोगाने स्पष्ट केलं आहे. यामुळे मतदानातील गोंधळ टाळण्याचा प्रयत्न करण्यात आला आहे.

एकूणच, महापालिका निवडणूक कार्यक्रम जाहीर झाल्यानंतर राज्यातील राजकीय वातावरण तापण्याची चिन्हे दिसत असून, येत्या काही दिवसांत सर्व पक्षांकडून जोरदार तयारी, रणनीती आणि प्रचाराला सुरुवात होणार आहे. महापालिकांच्या माध्यमातून स्थानिक पातळीवरील सत्तेचा कौल ठरणार असल्यामुळे, ही निवडणूक राज्याच्या राजकारणाच्या दृष्टीने अत्यंत महत्त्वाची मानली जात आहे.