🛑गणेशोत्सवानिमित्त रोटरी क्लब ऑफ कुडाळ तर्फे दिव्यांग भजन मंडळाला छत्री व कापडी पिशव्यांचे वाटप.

🖋️लोकसंवाद /- कुडाळ.

गणेशोत्सव हा भक्ती, आनंद आणि एकोप्याचा सण आहे. या उत्सवाच्या काळात कुडाळमधील दिव्यांग भजन मंडळ दरवर्षी घराघरांत जाऊन सुंदर भजनांद्वारे भक्तीमय वातावरण निर्माण करत असते. पावसाळ्याच्या दिवसांत हे मंडळ आपल्या कष्टाने व श्रद्धेने समाजात आनंदाची उधळण घडवून आणते. त्यांच्या या निस्वार्थ सेवाभावी कार्याचा गौरव करण्यासाठी आणि त्यांना प्रत्यक्ष मदत करण्यासाठी रोटरी क्लब ऑफ कुडाळ तर्फे विशेष उपक्रम हाती घेण्यात आला.

कुडाळ येथील भैरव मंदिरात आयोजित या कार्यक्रमात दिव्यांग भजन मंडळातील सदस्यांना छत्र्या व कापडी पिशव्या वाटप करण्यात आल्या. या माध्यमातून त्यांच्या दैनंदिन सेवेला सहाय्यभूत ठरणारा सामाजिक उपक्रम रोटरी क्लबने राबवला.

या कार्यक्रमाला रोटरी क्लब ऑफ कुडाळचे अध्यक्ष रोटेरियन राजीव पवार, सचिव रोटेरियन मकरंद नाईक, रो. रुपेश तेली, रो. आनंद वेंगुर्लेकर, डॉ. शिल्पा पवार तसेच रोटरी क्लबचे अन्य पदाधिकारी व सदस्य उपस्थित होते.

दिव्यांग भजन मंडळाच्या सदस्यांनी या अनोख्या उपक्रमाचे स्वागत करत रोटरी क्लबचे मनःपूर्वक आभार मानले. समाजातील विविध स्तरांवर सकारात्मक बदल घडवून आणण्याच्या हेतूने रोटरी क्लब सातत्याने सामाजिक उपक्रम हाती घेत असल्याचे अध्यक्ष राजीव पवार यांनी यावेळी सांगितले.

रोटरी क्लबच्या या उपक्रमाचे नागरिकांकडून मोठ्या प्रमाणावर कौतुक होत आहे. गणेशोत्सवासारख्या सणाच्या काळात समाजातील उपेक्षित घटकांना मदत करून त्यांच्या कार्याला प्रोत्साहन देणे हीच खरी रोटरीची सेवा परंपरा असल्याचे यावेळी उपस्थित मान्यवरांनी नमूद केले.