🛑कणकवली शहरात एकाच दिवशी दोन दारू अड्यांवर पोलिसांचा छापा कारवाईत 2 लाखाचा मुद्देमाल जप्त.

🖋️लोकसंवाद /-कणकवली.

कणकवली शहरातील मटका जुगार अड्ड्यावर पालकमंत्री राणे यांनी धाड घातल्यानंतर तालुक्यातील मटका,गुटका आणि अवैध दारू धंद्यांवरील कारवाईला मोठा वेग आला आहे.शनिवारी कणकवली पोलिसांनी एकाच दिवशी दोन दारू अड्ड्यांवर छापा टाकून एकूण १ लाख ९२ हजार ८०० रुपयांची गोवा बनावटीची दारू जप्त केली.यात दोघांवर गुन्हा दाखल करण्यात आला आहे.

शहरातील शिवाजीनगर येथे गोवा बनावटीची अवैध दारू विक्री सुरू असल्याची गुप्त बातमी सजल्यानंतर कणकवली पोलिसांनी शिवाजीनगर येथील तृप्ती तुळशीदास हुन्नरे (वय ५९) यांच्या घरी छापा टाकला. यावेळी घराच्या पडवीमध्ये ५ हजार ८०० रूपयांची गोवा बनावटीची दारू आढळून आली. सकाळी अकरा वाजता ही कारवाई करण्यात आली.

त्यानंतर कांबळी गल्ली येथेही पोलीस पथकाने छापा टाकला. यात वैशाली शशिकांत बोर्डवेकर (वय ५८, रा. कणकवली कांबळी गल्ली) यांच्या घराच्या पडवीत, अडगळीच्या ठिकाणी गोवा बनावटीच्या दारूचा साठा आढळून आला. या ठिकाणी १ लाख ८७ हजारांची गोवा बनावटीची दारू आढळून आली. ही कारवाई दुपारी साडे बाराच्या सुमारास करण्यात आली.या दोन्ही ठिकाणच्या कारवायांमध्ये पोलीस उपनिरीक्षक वृषाली बर्गे, हवालदार पांडुरंग पांढरे, हवालदार विनोद सुपल, पोलीस नाईक उज्ज्वला मांजरेकर आदी सहभागी झाले होते.