🛑डंपिंग ग्राउंडवर ‘ऑपरेशन मंगळसूत्र’ स्वच्छता कर्मचाऱ्यांनी वाचवले दीड लाखांचे दागिने!

🖋️लोकसंवाद /- दोडामार्ग.

आज सकाळी कसई दोडामार्ग सावंतवाडा प्रभागात घडलेली घटना क्षणभरासाठी सगळ्यांचा श्वास रोखून धरायला लावणारी ठरली. कसई-दोडामार्ग नगरपंचायतीची घंटागाडी रोजच्या प्रमाणे सकाळी ११:१५ वाजता कचरा संकलनासाठी आली होती. भाड्याने राहणाऱ्या सौ. सोनाली आपा देसाई यांनी कचरा टाकल्यानंतर काही वेळातच धक्कादायक गोष्ट लक्षात आली – त्यांचे सोन्याचे मंगळसूत्र गायब!

घरभर चहूबाजूंनी शोधाशोध झाली, पण दागिना सापडला नाही. “कचऱ्याच्या डब्यात पडले असेल” असा विचार करून त्यांनी तातडीने सावंतवाडा येथील सुप्रसिद्ध दशावतारी नाट्यकलाकार श्री. उली नाईक यांना संपूर्ण प्रकार सांगितला. उली नाईक यांनी वेळ न घालवता नगरपंचायत स्वच्छता कर्मचारी श्री. प्रताप राऊळ आणि श्री. सुनील आरोसकर यांच्याशी संपर्क साधला.

त्यानंतर सुरू झाले एक थरारक ‘ऑपरेशन मंगळसूत्र’! दोन्ही कर्मचाऱ्यांनी डंपिंग ग्राउंडवर धाव घेतली. घंटागाडीतून टाकलेला कचरा बाजूला सारून, घाम गाळत आणि दुर्गंधीकडे दुर्लक्ष करत त्यांनी कचऱ्याच्या ढिगाऱ्यात शोधमोहीम सुरू केली. आणि अखेर – सोनाली देसाई यांच्या कचऱ्यातच चमकले ते हरवलेले मंगळसूत्र!

आजच्या बाजारभावानुसार ज्याची किंमत तब्बल ₹१,५०,००० आहे, ते मंगळसूत्र कर्मचाऱ्यांनी सुरक्षितपणे परत श्री. आपा वसंत देसाई यांच्या हाती दिले. या प्रामाणिक व तत्पर सेवेबद्दल देसाई दांपत्याने स्वच्छता कर्मचाऱ्यांचे मनःपूर्वक आभार मानले.या घटनेमुळे सावंतवाडा परिसरात नगरपंचायत कर्मचाऱ्यांच्या प्रामाणिकपणाचे आणि तत्परतेचे कौतुक होत आहे. अनेकांनी सोशल मीडियावरही “अशा कर्मचाऱ्यांचा सन्मान व्हायलाच हवा” अशी भावना व्यक्त केली आहे.