🛑म्हापण ग्रामपंचायतीच्या जीवरक्षकाच्या सावधानतेमुळे वाचले मुलाचे प्राण.

🖋️लोकसंवाद /- कुडाळ.

रविवारी सायंकाळी खवणे बीच येथे समुद्राच्या पाण्यात स्नानासाठी उतरुन बुडत असलेल्या १५ वर्षीय आबा तारी राहणार आरवली या मुलाचे प्राण म्हापण ग्रामपंचायतीच्या मार्फत खवणे किना-यावर तैनात असलेल्या जीवरक्षकाच्या प्रसंगावधानामुळे वाचविण्यासाठी यश मिळाले आहे.

याबाबत सविस्तर वृत्त असे की,सध्या मे महिन्याच्या सुट्टीमुळे खवणे समुद्रकिनारा पर्यटकांनी गजबजलेला आहे. कयाकिंग या जलक्रिडा प्रकारामुळे मुळे येथे प्रचंड प्रमाणात गर्दी होत आहे.रविवार सायंकाळी ६-४५ च्या सुमारास अनेक पर्यटक समुद्रात स्नान करत होते. त्यांच्यासोबत कु.आबा तारी,हा देखील स्नानासाठी समुद्राच्या पाण्यात उतरला. समुद्रात आतमध्ये गेल्यानंतर पाण्याचा अंदाज न आल्याने व मऊ वाळूत पाय रुतल्यामुळे तो पाण्यात बुडू लागला. मदतीसाठी जोरजोरात ओरडल्यामुळे तीथे उभे असलेले म्हापण ग्रामपंचायतीचे जीवरक्षक श्री हनुमंत कोळंबकर यांनी तसेच स्थानिक मच्छीमार युवकांनी पाण्यात धाव घेत बुडणाऱ्या मुलास किना-यावर आणुन त्याच्यावर प्रथमोपचार केले. मुलगा आता सुखरूप आहे.म्हापण ग्रामपंचायतीच्या वतीने वतीने मागील अनेक वर्षापासून खवणे समुद्रकिनाऱ्यावर पर्यटकांच्या सुरक्षिततेसाठी दोन जीव रक्षक नेमण्यात आलेले आहेत. ग्रामपंचायतीच्या या उपक्रमामुळे ग्रामस्थ व पर्यटक यांच्या मधून समाधान व्यक्त करण्यात येत आहे.