तिलारी धरणावरून रानटी हत्तींच्या कळप आता शिरवल धरणावर..

लोकसंवाद /- दोडामार्ग.

तिलारी धरणावरून रानटी हत्तींच्या कळपाने आपला मोर्चा शिरवल धरणाकडे वळविला आहे.हत्तींच्या आगमनामुळे या परिसरात चिंतेचे वातावरण आहे.शिरवल धरणावर हत्तींचे आगमन होताच वन विभागाने सावधगिरी बाळगण्याचा इशारा ग्रामस्थांना दिला आहे.
तिलारी खोऱ्यात रानटी हत्तींचा प्रश्न तीव्र झाला आहे. आता – हत्तींनी आपला मोर्चा शिरवल धरण परिसरात वळविल्याने ग्रामस्थांसह वन विभागाची डोकेदुखी वाढली आहे. यापूर्वी रानटी हत्तींचा उपद्रव फक्त तिलारी खोऱ्यापुरताच मर्यादित होता. आता हत्ती पुढे सरकू लागला आहे. त्यामुळे संकट मोठे होण्याआधी त्यावर ठोस उपाययोजना वन विभागाने करावी, अशी मागणी शेतकरी व ग्रामस्थांनी केली आहे.

बागायतदारांच्या डोकेदुखीत वाढ शिरवल धरण परिसरात तसेच पंचक्रोशीत नारळ, सुपारी, केळी, अननस, काजू बागायती आहेत. रानटी हत्तींनी शिरवल परिसरातील बागायतींकडे आपले लक्ष्य केंद्रीत केल्यास ते मोठ्या प्रमाणात त्याठिकाणी नुकसान करु शकतात. त्यामुळे तेथील बागायतदारांचे चिंता वाढली आहे. वन विभागाने तात्काळ उपाययोजना कराव्यात, अशी मागणी तेथील बागायतदारांकडून होत आहे.